Donald Trump aser Kim Jong Un na medemer yimtepogo

Aami (June) 12, 2018 nü U.S. Tir Donald Trump aser Democratic People’s Republic of Korea Chairman Kim Jong Un na Capella Hotel, Singapore nung tenangzüktep ka agiba sülen salemba noksa nung angur.

Singapore, Aami (June) 12 (TYO): US Tir Donald Trump aser North Korea lennir Kim Jong Un na tanep 9:00 ako (local time) nung ajurutepa senden amen.
Singapore kübok Sentosa Island nung aliba Capella Hotel nung Trump aser Kim na kaketnang kati ao aser ghonda pungu shi senden amen. Tena den interpreter ka ka dang senden nungji aden.
Senden amenba sülen Donald Trump-i osangbener den jembidang, North Korea-i missile engine testing site tongtipang ka raksaogo aser parnoki nuclear weapons toktsüba ajanga masadangtetba jenjang atongtsü, ta ashi.
“North Korea-i nuclear weapons toktsür rongsenkettsüng dak sendakba mapa inyakra aser alima den tesentaktep yanglura, parnoki tajangzük jenti angutsü” ta paisa ashi.
“Chairman Kim jakdang maongka ka lir aser ibaji taoba mapang lennir shiangaia par nübortem atema meinyakdangba mapa ka inyaktsü atema lir. Nisung mashii kati rara adokdaktsütsü akok, saka tasütait nisungtemi ang yimjung yangluteter” ta Trump-isa shisem.
Tanü Trump aser Kim nati tezüluba ka nung sign asü aser iba nungji Korean peninsula nung denuclearization asütsü indang tenangzükba agia lir.
Senden amenba sülen Singapore Summit nung United States of America Tir Donald J. Trump aser Democratic People’s Republic of Korea Chairman Kim Jong Un nati külem sangdong ka metetdaktsü.
Senden nung President Trump aser Chairman Kim Jong Un nati U.S.-DPRK tesentaktep aser Korean Peninsula nung yimjung bener arutsü indang onüktem lemsatep.
Trump-i DPRK nem security tenangzükba agi aser Kim-ia Korean Peninsula nung denuclearization asütsü atema nangzükba metetdaktsü.
U.S.-DPRK tesentaktep tasen yangluba ajanga Korean Peninsula aser alima nung yimjung bener arutsü aser azükarutsü aser temulung lemtepa maparen inyakba ajanga Korean Peninsula nung denuclearization asütsü akok ta senden nungsa tenati jembi.
Tanü senden nung United States aser DPRK nung alirtemi yimjung aginüba aser azükarua linüba ama tesentaktep tasen ka yanglutsü nangzüktep.
Korean Peninsula nung yimjung bener arutsü atema United States aser DPRK-i yariteptsü atema Trump aser Kim nati nangzüktep.
April 27, 2018 Panmunjom Declaration nung nangzükba ama DPRK-i Korean Peninsula nung denuclearization asütsü atema nangzükshiba metetdaktsü.
Tenatisa United States aser DPRK nati POW/MIA mangtem bushiteptsü aser ajitetertem mang agütsütsü nangzüktep.
U.S.-DPRK summit ya putiotsü nung mezüngbuba lir aser iba ya küm aika mepetmesütep aser raratepa aruba sülen agiba senden ka asüba yong kanga tongtipang lir. Iba senden ajanga linük ana atema tarutsü tasen ka lapoktsür ta Trump aser Kim nati külem sangdong agütsüba nung shia lir.
United States aser DPRK-i maneni ajurutepa sendentem amentsü nangzüker aser sendentemji U.S. Secretary of State, Mike Pompeo aser DPRK nungi tongti ketdangser ka lenisüba kübok tekaratiba nung amentsü, ta tenatisa telemtetba agi.
United States of America President Donald J. Trump aser Democratic People’s Republic of Korea indang State Affairs Commission Chairman Kim Jong Un nati Korean Peninsula o alima atema yimjung, azükaru aser security ajungkettsü atema U.S.-DPRK tesentaktep tasen yanglutsü nangzüker, ta tena indang sangdong nungsa shia lir.