Mkg nung World Blood Donor Day amungba osang

Mokokchung nung ‘World Blood Donor Day’ amungba mapang Mongsenyimti nunger Mokokchung compound nung alir Imkongwati-i azü tenla agütsüba mapang tangokba noksa nung angur. Pai tang azü tenlaba ya züngabo 11 ben agütsür. Mokokchung, Aami/June 14, 2018.

Mokokchung, Aami/June 14 (TYO): Alima ajunga nung “World Blood Donor Day” amungba den külemi Mokokchung nunga Blood Bank IMDH den yaritepa Mokokchung District Voluntary Blood Donors Association (MDVBDA) aser District Aids Prevention and Control Unit (DAPCU)-i sentong tajung ka IMDH nung ayongzüka mungogo.
Iba anogo ya tongtibangsa nüngdakbapurtem nem azü tajung tenlaa nisung taküm kümzükba den azü tenlaba indang nüburtem nem tali meteta kümdaktsütsü nükjidong nung küm shi ayonger. Taküm küm asoshi omenji “be there for someone else” aser yimyim (slogan)-ji “give blood, share life” nung ajemdaker munga liasü.
Iba anogo amungba den külemi azü (blood) tenlanürtem asoshi sentong ka agia liasü aser iba nungji Mokokchung nung aliba 44 Assam rifles jawans-tem, People’s College nungi kaketshirtem, osangzülur nungi aser temulungertemi shilem agia liasü.
Azü tenlar rongnung Mongsenyimti nunger Mokokchung compound nung alir Imkongwati den iba osangbeneri jembidang, alima nung ya azü nüngdaka timtembapur aika lir, anungji, parnok taküm kümzüktsü nükjidong yur joko tang agi 11 ben tenlar, ta pai ashi.
Anema yutsüra ano maneni tenlatsü aser azü tenlaba ajanga nisung taküm kümzüker ta angateta ajaki azü tenlaba nung shilem agitsü asoshi pai ayongzüka liasü.
Azü tenlar shia nem tepela tamaitsü tayongeri Voluntary Blood Donor Certificate den Donors Card, Donors Badge aser tang ya FIFA World Cup mongpu asünung, pei-i pukümba linük wako kaka senpettsü.