Nike-i Iran nunger asayar nem tsüngsem magütsütsü

New Delhi, Aami/June 14 (Agencies): US-i sanctions tasen agütsüba sülen sportswear yangluba company tetsüti Nike puri Iran nunger football asayartem nem boots supply asüba anenogo.
“US puri sanction agütsüba tetezü US company ka ama Nike puri Iranian national team nem tsüngsem magütsütettsü.
“Sanctions balala küboki Nike dena aiter koba küm aika benoka lir aser iba ya ozüng küboki aittsü.
Taoba ita Tir Donald Trump-i Iran aser world powers tem den nuclear deal raksaba sülen iba telemtetba ya agi.
Pai 2015 küm yangluba deal ya raksaa economic sanctions tanaben benoktsü asoshi nangzük. Nike puri iba telemtetba agiba atema Iran nunger asayartem mepelar aser coach Carlos Queiroz-i FIFA dang teyari meshiogo.
Queiroz-i taoba mapang nung Portugal aser Real Madrid coach süogo; pai ashiba agi, “asayartem parnoki asemba tsüngsem agi yimya separ aser tang iba amala tongtibang asaya ka atongtsü hopta ka lia melentsüji shidak masü.
“Onok ya manager aser football asayartem dang lir aser iba amala ken o nung madentsüla, saka onoki FIFa dang onok yaritsü asoshi mepeshir.”
Iba tatalokba ajanga social media nung nüburtem aikati mepelaba lemsatepogo aser Iran nunger aikati Nike product tem nokdangtsü asoshi campaign tenzükogo.
“Iran-i Israel den asayatsü asoshi memulungba mapang nungbo saisapong den yimten yimsüsüba meyoktepdaktsür, ta ashir, saka Nike-i Iran nunger asayar nem boot agütsütsü asoshi memulungba mapang nungbo FIFA-i kecha mashir.
Kanga bulua lemsatepba video ka nung Iran nunger dentist kati Nike tsüngsem pair ka jana bendendak inoktsür, aser ashiba agi, iba telemtetba ya par nüburtem aser football asaya meimertem mezüngmeshiba maparen ka lir.
Ajisüaka kasa mapang nung Iran nunger aikati Nike pusema ashiba agi, parnok ya private company ka lir aser parnok asoshi kecha lenmang mali.
Mapang kanga dang petdaka akümba ajanga Iran nunger asayartem asaya sübotsü shidak sobur asayatsü asoshi jenjang aika agitsüsa aküm
Parnok rongnung kari parnok club nung külemi asayar bendanger asayartem dang boot aputsütsü asoshi asüngdangogo aser karbo parnok medemertemi alitsü aser ano kari store temi oa parnok sasa aliogo.
Maneni Iran nunger Greece den tesendaktep raksaba sülen tanabuba warm-up asaya Kosovo den asayatsü aliba thiogo.
Iran nunger mezüngbuba asaya Morocco den Rogonü asayatsü.