Pema Khandu -i Arunachal Pradesh CM Dashboard sayatsü

Itanagar, Aami (June) 15 (Agencies): Arunachal Pradesh Chief Minister Pema Khandu-i Brihostibarnü ‘Arunachal Pradesh CM Dashboard’ (http://cmdashboard.arunachal.gov.in) sayatsü.
Iba ajanga state sorkari Centre aser state sorkari teyari agüja inyakba projects aser schemes mita reprangtsü.
“Iba ‘Dashboard’ ajanga district shia aser department temi mapa mapa inyakba metettsü aser maparen tajungba nung inyaktettsü” ta district and the departments-i sayatsüdang ashi.
“Ni Chief Minister akümba sülen mapa kar tenzükba nung iba mapatong ka ka lir. Ochimashi azüoktsü aser digital mode nung maparen inyakba ajanga mapa tajungba inyaktettsü nükjidong nung iba ya sayatsür” ta paisa ashi.
Taoba mapang amshiba paperwork nung sen aika endoker aser mapang-a tali agir. Iba jagi sorkari mapa timi meinyaktetter. Anungji, sorkar ketdangser ajaki dashboard ajanga osangtsüsang belenshitsü ayongzüker, ta Khandu-isa shisem.
Dashboard nung aliba osangtemji ketdangpurtem atema dang masü saka tenokdangba kecha melii public-ia angutsüla, ta paisa ashi.
Tang tashi nung education, health aser agriculture department temi dang CM dashboard den database sendaktepa lir, anungji tanüngba department ajaki sendakteptsü mayongzüker, ta chief minister-isa metetdaktsü.
“Iba ajanga public-i department shia aser sorkari inyakba mapaten indangindanga reprangtettsü” ta paisa shisem.
Iba sentong nung Deputy Chief Minister Chowna Mein aser Chief Secretary Satya Gopal natia o jembi.
IT Special Secretary Prince Dhawan-i CM dashboard indang temetettsütem power point presentation ka ajanga sayu.
CM dashboard project ya November 10, 2017 nü tenzük aser Arunachal Pradesh State Council for IT & E-Governance (SCITeG) o Department of IT & communications nem iba mapa ketdangsüa inyaktsü lemzükja liasü.