DPDB Kohima-i sorkar schools nungi Topper nem tetushi agütsü

Aami/June 15 nü DPDB’s Conference Hall, Kohima nung Kohima district kübok sorkar school nungi HSLC Topper, Heurangdaile nem tetushi agutsüba sentong nung topper den Advisor, Dr. Nicky Kire aser ketdangsertem tangokba noksa nung angur. 

Kohima, Aami/June 15 (TYO): Tanü DPDB’s Conference Hall, Kohima nung Kohima District Planning & Development Board-i Kohima district kübok sorkar school tem nungi HSLC Topper nem tetushi agütsüba sentong ka ayongzüka agiogo, ta tanü ketdangsertem osang ka ajanga metetdaktsü.
Sentong nung jembidang Rural Development Advisor, Dr. Nicky Kire-i, meranga inyakba dak alaka tanga lenmang mali, ta shia topper jenjang angula dang subject matter kanga shisa kaa shimtsü ajungshia ‘tanü nai shimba subject ji ajanga nü nükjidong lenmangi anitsü’ ta ashi.
Pai Topper, Heurangdaile Guing nem tenüngsang agütsüba den külemi tarutsü nunga meranga inyaktsü aser tarutsü nung lenir tajung küma lokti atema mapa tajung inyaktsü ajungshia liasü.
Asür Dr. Neilhouzhu Kire’er kinüngertem tenüng nung jembidang taoba mapang MLA, Abao Kire-i, pa tebu ji shisashir ka liasü aser Naga nunger rongnung mezüngbuba matriculate liasü (1918 küm), ta metetdaktsü.
Paisa, “Dr. Neilhouzhu Kire Angami Award 2018 ya tebu matric pass asüba sülen küm 100 ajungba nüngtem nung agütsür, ta metetdaktsü.
Paisa Kohima DPDB züngsemtemi iba ama sentong ayongzüka kaketshirtem ajungmesoba atema pelaba lemsatepba den külemi HSLC topper nem award agutsü.
Ruzhukhrie GHSS, Kohima nungi HSLC Topper, Heurangdaile Guing-ia lar tesayurtem, tsürabur aser guardian-i nungita yariba ajanga iba takok nguogo, ta parnok ajak dang pelaba lemsatep.
Vice Principal, Ruzhukhrie GHSS, Kohima-i topper Heurangdaile Guing 2013 küm nungi iba school nung azüngba indang tongmelang agi metetdaktsü.
Laisa, Guing-i takok anguba ajanga School nem tenüng tajung bener arutsüogo, ta ashiba den külemi DPDB-i kümshia iba sentong ayongzüka katsüba atema pelaba lemsatep.
DC aser Vice Chairman Kohima DPDB, Rajesh Soundararajan, IAS-i topper nem tenüngsang agutsüba den külemi Government teaching staff, Principal aser Vice Principal nema tenüngsang agutsü.
Paisa sorkar school temi inyaktetbatem asadangtsü mapang tongogo aser tesayurtemia tarutsü nung jenjang tajungba akumtsü atema asadanga asalentong yanglutsü ajungshia liasü.
Pai award angur nem DPDB Certificate of Merit den senpet agutsü, DEO (Education), Kohima-i tepela anküp o jembi aser Vice Principal, Ruzhukhrie GHSS, Kohima-ia o tatsüka jembia liasü.