NLSF-i Nagaland DGP memelendaktsünür

Dimapur, Aami (June) 15 (TYO): Nagaland Law Students’ Federation (NLSF)-i Nagaland sorkar dang DGP Nagaland Rupin Sharma mapa nung belentsü telemtetba agiba meyipa reprangshiang ta mepishi.
Rupin Sharma-i mapa tajung aika inyaka arur aser iba atema public-i pa dang tamang akar aser ajungmesor. Iba ama mapang ka nung sorkari pa mapa nungi belenbaji meputep lir. Pa ya 1992 Nagaland cadre ka lir aser pai mapa tajung inyakba ajanga seniority o criteria ajak ajangteter, ta NLSF ketdangpurtemi sangdong ka nung ashi.
Public-i yimtenren ajanga shimba masü saka nübortem asoshi inyakba DGP ka aginür. Rupin-i police department nung temelenshi bener aruba aser social media ajanga tongtepratepba atema lanurtemi pa kanga sakloker aser Nagaland police tenüng-a tajungba kümogo. Talisa pai tepuokdak ayurtem asoshi skill development program tenzükba aser ano tanga mapa tajung aika tenzükbaji kanga tajung aser iba ajanga pa ochishir ka lir ta kuli sayur.
Pai Nagaland nung SDPO, additional SP,SP aser DIG mapatem inyakba den State, National aser International jenjangtem nung mapa balala inyakaka, pai aika ajangshia mali ta asüba onük nung ajemdaker pa mapa nungi belentsü telemtetba agibaji kanga dang shisa maka inyakyim ka lir, ta NLSF-isa metetdaktsü.
State sorkari Ministry of home affairs (MHA) ajanga telatetba agütsüba nung aliba ama mesüi pa DGP inyaktsü shim. Ajisüaka, tang pa mapa nungi belenbaji Supreme Court tetuyuba alema lir, kechiyong SC-i DGP kaji küm anabosa inyaktsüla ta shiogo, ta parnokisa shisem.
Anungji, public taginüba angateta sorkari Nagaland DGP melentsü atema telemtetba meyipa repranghitsü mepishir, ta NLSF-isa ayongzük.