Lucknow nung opposition teloktep sangdongtsü

Kolkata, Aami/June 16 (Agencies): Lucknow yimti nung senden tuluka ayongzüka opposition lenirtemi party tem teloktep sangdongtsü, aser iba sentong nungji West Bengal Chief Minister asaer Trinamool Congress tongti, Mamata Banerjee-a adentsü, ta osang ka ajanga metetdaktsü.
Tan ita Bengal chief minister Mamata Banerjee-i China semdangba sülen Lucknow nung Opposition party tem senden atema asalentong yanglutsü.
Tamalen Banerjee-i, Samajwadi Party tongti, Akhilesh Yadav aser BSF tongti, Mayawati nati Lucknow nung ayongzükba sentong nung adentsü atema la jaokra lai adentsü ta jembia liasü.
Banerjee-i mapang talangka state yimtenren, panchayat aser by elections nung kanga mazüngi inyakogo, ajisüaka kobi melii lai National yimtenren nung ajemoka shilem agitsü, ta Trinamool Congress lenirtemi metetdaktsü.
Trinamool lenir kati, “2019 küm Lok Sabha elections ji Uttar Pradesh aser Mayawati o Akhilesh na loktepba nung tuluka keta lir. Iba ama teloktep atema Banerjee-i inyaka liasü. Lai Akhilesh dang by election atema Mayawati den lokteptsü ajungshia liasü, aser tenatia melung. Iba teloktep ya ano tajungba akumtsü atema lai (Mamata) inyaker,” ta metetdaktsü.
Lucknow nung ayongba senden nungji Opposition lenirtem ajak alitsü aser Mamata Banerjee lia iba teloktep sangdongtsü, ta paisa ashi.
Uttar Pradesh nung tongti party ana tsüngda menden lemsatsü atema maparen inyakdar, ta paisa metetdaktsü.
Tan ita tatemlen Mamata-i China semdangba sülen lai Chennai nung DMK lenir, Stalin ajurutsü. Laisa Karnataka, Andhra Pradesh aser Telangana nungi lenirtem ajurutsü.