Taliban telungpurtem Afghan yimtiba nung Eid benjung among

Kabul, Aami 16 (Agencies) : Tanü Küptoknü Taliban telungpur aika raraba oset mebeni dang Afghan yimtiba Kabul tonga aruagi yimjung aliba temaitsü sayua ita ka songtema lumia aruba Ramadan sentong tembanga jangratema bejungtepogo, ta police-i osang ka metetdaktsü aser tanga tesemtem nunga sepaitem o telungpurtem ajurutepa azütepba den noksa tangoktepogo.
Eid benjung nüngtem nung Taliban telungpur tsütsü nungia taoksatsüka anogo asem yimjung alitsü osang metetdaktsür liasü.
Taliban telungpurtemji south & southeast süngkhüm adena Kabul yimti telungi ait.
“Parnok ket nung prangpong injang bena mali kechiaser itemji süngkhüm nung toktsür aru,” ta Reuters osang den jembidang Kabul police otongdar, Hashmat Stanekzai-i metetdaktsü.
Paisa ashiba agi, parnok yimti toktsür aodang par osetji parnok nem meyipa agütsütsü.
Kabul yimti nungi anüolentip tsütsü Logar province aser south & central Maidan Wardak kübok Zabul nung sepaitem o Taliban telungpurtem pelatepa azütepba aser Eid salem lemsatepba indang video aser noksa balala osang agütsüba website balala nung inokja lir.
Parnok karbo teka madena tsüngsangtep aser ibaji tereprangertemi smartphone nung noksa tangok.