Mexico nunger million 25 Japan limai yoktsü : Trump

Washington, Aami 16 (Agencies) : Mexico nunger million 25 Japan limai yoktsü ta US Tir, Donald Trump-i Japan Ato Kilonser, Shinzo Abe amokmerena metetdaktsüogo.
US Tiri iba senden nung benokba ‘consensus statement’ agizüktsü khenyongi memelungba aser Canada Ato Kilonser, Justin Trudeau kanga sashia aija jembiba sülen industrialized link tazüngtem nungi adenshia akaba G7 (Group of Seven) senden tobur junga metembangtet.
Iba denji külemi shishilembaba, kiralongraba aser tapi agi nüburtem pakokba (migration) amala kenotem nung ano lenirtem tsüngda kanga sashia aitsütepa jembi, ta senden nung adener European official-temi ashiba olen ka Wall Street Journal ajanga sangdongogo.
Paia olen ka nungbo Europe atema ‘migration’ ya tebilemtsü tulu ka lir ta metetdaktsü saka ajiser ajungbena Abe dang, “Shinzo, nenokbo iba tebilemtsü ya mali saka ni nenok dangi Mexico nunger million 25 yoktsü aser na yakta ne menden nungi alutsü,” taTrump-i metetdaktsü; ibaji ajanga taktang nung alirtem mepela, ta EU official kati shiogo.
Osang ajanga ashiba agi, Iran aser kiralongrartem tsütsü ken o benoka jembidang Trump-i France Tir, Emmanuel Macron aitsütsü tenzük.
“Emmanuel, iba indang ya nai metettsüla kechiaser kiralongrartem ajak Paris nung adenshia lir,” ta Trump-i metetdaktsü.
Trump-isa European Commission nung Tir, Jean-Claude Juncker danga nisung tepseter ta nenshia ashi.
Canada lima nung ayongzükba senden nung shishilembabaren tsütsü mangatettep jenti adoka ken o atsütepa jembi aser tongtibangsa steel & aluminum nung Trump-I saru sashia meshitsü amokmerenba indang alima nung rongsenren tsütsü tashi tulu aliba kintemi pa aitsü.