NPF-i NDPP o meyiptsür; Naga nunger temeten atema noktaktsü

Dimapur, Aami (June) 16 (TYO): Naga People’s Front-i media ajanga tenüng tajung angutsü kecha jangraa mali saka NDPP-i par kibur Neiphiu Rio pusema nungitba angudang kanga memenür. NPF-i Naga nunger dak sendakba tebilemtsütem lemsateper saka NDPP-i item onüktem ya tenüng tajung angutsü atema jembir ama kümdaktsür, ta NPF-i tanü ashi.
NPF ya Nagaland nung regionalist political party tongtiba lir aser tawa tasen tentetba NDPP ama masü saka onoki Naga nunger tarutsü atema tebilemtsü abener. NDPP nung lennirtem ya mashii mapang ka nung telok melenshitsü aser asüng Nagaland political map nung parnok malitsü.
Rio-i Aami (June) 12, 2018 nü New Delhi nung osangbener den jembidang Naga nung longjemtsübaji tamakoktsü aser PDA sorkari Citizenship Amendment Bill 2016 anema menokdaktsü ta ashi saka NDPP-i pa pusema nungitba atema ratar. Rio-i kechi atema iba onük jembi’ar memetet saka NPF-i Naga nunger tarutsü atema noktaktsü aser temeten atema raratsü, ta Press Bureau, Naga people’s Front sangdong ka nung metetdaktsü.
Naga nunger Arrla 371 (A) ajanga kümzüka lir anungji PDA sorkari Citizenship Amendment Bill 2016 anema menokdaktsü ta ta Chief Minister-i ashi. Iba onük atema NPF-i Chief Minister dang Arrla 371 (A) nung koba Clause ajanga Nagaland Citizenship Bill nungi kümzüka lir ta asüngdanger. Taoba küm 55 tsüngda Dimapur aser temeket nung Naga nunger Arrla 371 (A) ajanga koba tashi kümzüka lir, ta parnokisa ashi.
Chief Minister-i Naga nunger longjemtsüba anema kechiba noktakba aser Citizenship Bill pusema nungitba atema osang tejangja metetdaktsüla, kechiyong iba Bill ajanga Naga nunger litsü telungi ozüng alema arurtem aitdaktsütsü aser Tripura state ama Nagaland-a kümdaktsütsü ta NPF-isa metetdaktsü.
Iba onük ana atema Naga nunger NGOs aser Civil societies-i ola adoktsüla ta NPF-ibo bilemer kechiyong asenok külemi inyak nung dang Naga nunger tarutsü kümzüka yutettsü, ta parnokisa shisem.
Taoba küm 15 tashi NPF sorkar alidang Assembly nung Naga nunger longjemtsü atema telemtetbatem agi aser Rio asemben tashi Chief Minister inyakdaktsü. Pa chief minister iyakdang Naga nunger longjemtsü asoshi telemtetba agi saka ibaji Chief Minister menden nungi masü NPF party sorkar tenüng nung agi.
Dr. Shürhozelie Liezietsu-i mapang tatsüka Chief minister inyakdang Manipur state semdang aser tang teinyakdak Chief Minister Biren Singh den ajurutepa Naga nunger dak sendakba tebilemtsütem lemsatep. Item ajanga NPF-i jembiba ama mapa inyaker ta kuli sayur, ajisüaka NDPP-i nübortem tsüngdang tiyazü tenangzükbatem agir, ta Press Bureau sangdong nungsa shia lir.
Rio-i Chief Minister menden toktsür Delhi-i aoba sülen NPF sorkari yimjung maparen tajungba nung inyaktsü atema “Cabinet Committee of Political Affairs Mission” tentet aser Political Affairs Mission asoshi G. Kaito Minister shim, ta parnokisa shisem.
Naga Civil Society temi election magidang yimten latettsü ola agütsüba nung ajemdaker taoba assembly election nung NPF-i nominations masü aser ibaji atema Centre-i TR. Zeliang ya linük anemer ka ta züngshi. Ajisüaka, NDPP-ibo BJP den menden lemsateptsü tenangzüktep agi aser yimten latettsü atema election ta yimyim ayimoktsü.
NPCC-i adokba kaket NPF-i pusema nungiter ta NDPP-i tai tongloktsür aser iba atema NPF lennirtem- C Apok aser SI Jamir tenüng tetshiogo. Ajisüaka, party mashi ka nungi NPF nung arua adentsü akok aser parnok party nung züngsem akümba ajanga party temzüng agizüker aser party inyaksangshi sülen anidaker. Anungji NDPP-i iba onük atema tai tongloktsüba nung parnok metentsüsa kecha mali, ta NPF-isa metetdaktsü.
NDPP-i mapang shia media nung TR Zeliang indang educational qualification onük sangdonger aser iba atema süngmanger, kechiyong iba onük atema Supreme Court of India-i oshidang agütsüogo. Anungji NDPP-i tanur asayamenüba ama iba onük ya lepshipet lepshir, ta parnokisa ashi.
NDPP-i tezülutsü kecha mali aser parnoki o atsütepba ajak nung tamakok anguba ajanga parnok shisabulur aser PDA sorkar ya mashii mapang ka nung loksatsü ta Press Bureau-isa metetdaktsü