Seychelles Tir, Danny Faure-i anogo 6 nü India semdanger

New Delhi, Aami/June 22 (Agencies): Tanü nungi tenzüka Seychelles Tir, Danny Faure-i India anogo troknü semdangba mapang nung pai Ato kilonser, Narendra Modi den senden amentsü aser defence & security densema onük aika nung linük ana tesendaktep tajungba akumtsü atema jembitsü.
Tawa Faure-i, par linük nung aliba Assumption Island nung naval base ka amenoktsü atema India densema inyaktsü aliba project ji meinyaktettsü, ta metetdakja liasü. Ajisüaka pai India semdangba mapang iba onükji India lenirtem den mejembitsü ta shiogo.
2015 küm asetkong nungji naval base ka amenoktsü atema India den tezüngzüktep ka agia liasü, ajisüaka Seychelles nung opposition teloki anemba ajanga iba project ji thinener.
Iba project ji mapa küma inyak asübo ibaji ajanga Indian Ocean Region nung India jenjang ano tajungba kümla.
India-i Assumption Island nung naval base ji amenoka jenjang yanglunüa liasü, kechiyong iba region nungji China-i lar mitkartem junga amenoktsü merangdar.
2015 küm Modi-i Seychelles semdangba mapang nung linük ana senteper naval base amenoktsü atema tezüngzüktep ka agia liasü.
Aami/June 22-27 anogotem nung India semdangba mapang Faure-i Gujarat, Goa aser Uttarakhand state tema semdangtsü, ta Ministry of External Affairs (MEA)-i sangdong ka nung metetdaktsü.
Faure-i Gujarat aser Goa na semdangba sülen Tentonü/Hombar Rashtrapati Bhavan nung pa agizüktsü, iba sülen pai Rajghat semdanga Mahatma Gandhi nem akhüm agutsütsü, ta MEA sangdong ajangasa metetdaktsü.
Faure-i Tir, Ram Nath Kovind ajurutsü aser Modi leniba nung ketdangsertem den senden amentsü. Ano tatong Tir, Venkaiah Naidu aser External Affairs Minister, Sushma Swaraj natia Faure ajurutsü.
Faure-i India-Seychelles Business Forum nunga jembitsü. Pa den cabinet minister ana, secretaries of state pezü aser tanga ketdangsertem densema arua lir.