GST ajanga rongsenkettsüng nung temelenshi adokogo: PM Modi

New Delhi, Aami/June 22 (Agencies): Tanü Ato kilonser, Narendra Modi-i, Goods and Services Tax (GST) ajanga India nunger rongsenkettsüng nung telmelenshi tajung aika adokogo, ta nenshia metetdaktsü.
India Gate, Delhi anasa Department of Commerce atema office complex tasen, Vanijya Bhawan yanglutsü atema lung azünga yutsüba sülen jembidang Modi-i, building ya sangküm Luchii/December matongdangsa renemtsü imlar, ta ashi.
Ato kilonseri, “Technology ajanga tanübo shishilembatsü atema lenmang zübazüba kümogo, aser iba ya tarutsü nung ano tajungba akumtsü. GST ajanga rongsenkettsüng nung temelenshi tajung aika adokogo,” ta ashi.
Iba building ji ali acre 4.33 nung sen crore 226 indoka yanglutsü aser iba office nungji ketdangser aser staff 1000 shi asemtsü.
Iba building nungji technology tasen aika inoka yanglutsü aser Central Vista architecture alitsü. Paperless office asüba den külemi smart access control, video conferencing aser completely network systems densema art facilities aika alitsü. Iba building ji India nunger rongsenkettsüng ainba temaitsü ka asütsü.