Assam nung Goalpara SP küm 2 tepoukdak ayutsü

Guwahati, Aami (June) 22 (Agencies): Küm pongu tejaklen nisung tepset, ta tai tonglokja alir ka tepuokdak reshikangshiba atema Guwahati okadak kati Goalpara SP, Amitav Sinha küm ana tepuokdak ayutsü aser sen 50,000 senchi achitsü obendang agütsü.
Okadaki IPC Section 330 kübok Sinha aitsü. Ajisüaka oshidang agütsüli Sinha-i bail temepishiba meshi aser angu.
“Onoki high court nung temepishiba agütsütsü atema hopta pezü angu. Onok anema kuli mali. Amitav Sinha-i tai tonglokja alisang dang asüngdangya asü. Ajisüaka pai okadak pa police ket nung reshikangshi asü ta ken o benok,” ta Sinha atema okatsür Angshuman Bora-i ashi.
Guwahati high court-i iba ken o district sessions court nung angadanga aru.
Gurmeet Singh-i okadak ken o benokba nung pa reshikangshi aser hockey stick agi züka merenshiba ajanga pa teka raksa, ta shia lir.
June 17 nungi 18, 2013 tashi pa police ket nung ayudang police-i pa jana aolen petrol enoktsür reshikangshi, ta Gurmeet Singh-isa shia lir.
Iba tatalokba mapang Sinha ya Guwahati nung additional SP (crime branch) inyaka liasü.
2012 küm Jammu & Kashmir nung Guwahati nungi shishilembar Ajit Singh tepsetba atema Gurmeet apu aser Sinha-i pa dang asüngdangya asü.