Venezuela nung ozüng shidak mamshir: UN

Caracas, Venezuela, Aami 22 (Agencies) : Linük nung ozüng shidak mamshitetba ajanga Venezuela nung sorkar sepaitemi kuli tejangja makai tapi agidang nisung aika tepsetogo, ta tanü Rogonü United Nations report ka nung aija metetdaktsüogo.
UN High Commissioner for Human Rights Office ajanga ashiba agi, temulung malem bilemtsüsa nisung 500 shi tepsetba maparen nung densema aliba Venezuela nunger officer-tem tang tashi aija mali.
Yamala tim masüba maparen tenük zünga reprangba mali nungji state ketdangsertem nem tai metongloktsür, ta high commissioner, Zeid Ra’ad Al Hussein-i metetdaktsü.
Yamala tim masüba maparenji ka taküm küm tetenzüklen ataloka lir; bangdak anema nokdakba police officer Oscar Perez aser pai aniba telok nung nisung trok kaset; parnoki aibelenogo ta nangzüktsü merangba mapang parnokji tepset ta angazüker.
Sorkar ketdangser tazüngpurtemi ozüng agütsüba nung ajemdaker, par temeten anema iba telokji tepset südi ta UN official-temi temulung malem bilemba olen ka metetdaktsüogo.
“Venezuela nung ozüngji mapa agi inyaka moteter. Aibelenertem nem tapet temerenshi magütsütetba yamala maparenji anentsüla,” ta kasa report nung Zeid-i shia lir.
Aji oda süaka, tanep anepbongi Venezuela nung sangdongba report dak sendakba nungji Venezuela sorkari ano telangzüba kecha magütsüi liasü.