Yimsü lennir nem tasüba temerenshi agütsür

Jakarta, Aami 22 (Agencies) : 2016 küm Islamic State purtemi inyakba tashiyim maparen nung shilem agiba atema Indonesia nunger yimsü lennir, Aman Abdurrahman tasüba agi merenshitsü atema tanü Rogonü obendang agütsüogo.
Jakarta yimti Starbucks cafe nung nisung kati pa mangji bomb kümer taküm bendanga agüja iba tashiyim maparenji inyak.
Jakarta yimti nung aliba court-ji sepai aikati longbanger nüka lia ken oji angadang; nisung pezü tepsetba tashiyim maparen nung Abdurrahman-i aibelenbajibo tamalen obendang agütsüdang jangjaogo saka tasüba agi merenshitsü ozüngjibo tanüang agütsü.
“Kiralongraba maparen inyakba kuli tejangja ngutetogo,” ta obendanger, Akhmad Jaini-i metetdaktsü aser aibelensang nem tasüba temerenshi agütsüdang paisa ashiba agi, tanga tashiyim maparen nunga Abdurrahman densema liasü.
“Pa nem tasüba temerenshi agütsür.”
Aija aliba kiralongraba maparen inyaktsü asalentong yanglusangji okadak tiyong nung mena liasü aser pa nem temerenshi agütsütsü inyaktepba indangji pai kanga süoki ia mebilem.
Alima nung Muslim yimsü amangertem teimba ser aliba linük tulutiba Indonesia lima nung ‘firing squad’ ajanga aibelena alirtemji tepseta endoker.