Pervez Musharraf-i APML chairman menden toktsür

Islamabad, Aami 22 (Agencies) : Tanü Rogonü taoba Pakistan Tir, Pervez Musharraf-i All Pakistan Muslim League (APML) chairmanship menden toktsüogo
Tang party nung mendenbuba tasenba, Mohammad Amjad-i ashiba agi, bendang linük nungi party ketdangsütsüji tamakoktsü asünung, taoba lenniri iba menden toktsüba shityji Election Commission dangi yokogo.
Aruya aliba general election nung NA-1 Chitral menden atema tokteptsü asoshi kenbo temelaba agüja liaka tanaben Supreme Court-i iba temelabaji ageinadokba ajanga Musharraf indang ‘nomination papers’-ji Election Commission-i magizük.
Pa okadaki jaokaka pai tashi manga nungji Supreme Court-i pa nem temelaba magütsür.
Osang ajanga ashiba agi, party nung taoba tongti zülur, Mr Amjad chairman mendeni ajungketogo.
Tang pa tetuyuba nung party inyakyim ajak bener aotsü aser election nung APML teloki inyaktsü shilem indanga pai telemtetba agitsü, ta Pakistan osang ajanga metetdaktsü.
Geo News ajanga ashiba agi, chairmanship menden melenba indangji agizüktsü atema party-i Election Commission dangi temepishiba shity ka züluogo.
Musharraf-i chairman menden tokjaka APML nung tekolakbajibo (supremo) pasa asütsü ta angazüker.
APML ya 2010 küm Musharraf-i tenzük. 2013 küm election nung shilem magitsü ta party-i sangdongaka candidate anabo toktep aser Chitral kübok menden ana nung takok angu.
Pa anema ken o balala benoka aliba ajanga 2013 election nunga Musharraf (retired general) election-iaitsü temelaba magütsü.
Pa anema ken o tepdaka liaka iba nung jagi jenshia linük toktsür aoba sülen pa mepudaktsütsü nükjidong nung tang Musharraf ya United Arab Emirates kübok Dubai nung pasasa jenoa oagi lidagi.