Bushisüngdang atema Aadhaar biometric data mamshitsü

New Delhi, Aami (June) 22 (Agencies): Unique Identification Authority of India (UIDAI) ajanga biometric data bendenba ya Aadhaar yanglutsü aser cardholders jangjatsü atema dak alia tanga mapa kecha atema mamshitsüla, ta tanü UIDAi-i metetdaktsü.
Ozüng alema mapa inyakba bushisüngdangba maparen nung Aadhaar biometric data amshir ta osang kar adokba sülen UIDAI-i sangdong ka nung Aadhaar Act nung arrla 29 nung ajemdaker iba tetuyuba agütsü.
Aadhaar Act nung arrla 33 ajanga national security dak sendakba ken o tem nung Aadhaar biometric data amshitsü temelaba tera agüja lir saka ibaji Cabinet Secretary kati aniba oversight committee ka nungi temelaba anguba sülen ang amshitettsü ta parnokisa ashi.
“Supreme Court nung tang Aadhaar ken o benoka aliba nung India sorkaria iba tangatetba nung noktaka lir. Iba nung ajemdaker UIDAI-i kodanga bushisüngdanger telok den biometric data lemsatepa mali. Mumbai High Court kati ken o ka nung biometric data lemsateptsü tetuyuba agütsüdang iba onük Supreme Court dangi aben aser UIDAI-i ashiba pusema oshidang agütsü” ta UIDAI-isa metetdaktsü.
Police-i aibelenertem aputsü atema Aadhaar data nungi osang kar nüngdaker ta National Crime Records Bureau Director, Ish Kumar-i yashi ashi saka tanü UIDAI-i iba osang metetdaktsüogo.