RSS teloki New Education Policy nung Sanskrit azüngtsü benoker

New Delhi, Aami (June) 22 (Agencies): Rashtriya Swayamsevak Sangh (RSS)-i pusema nungitba Bharatiya Shikshan Mandal (BSM)-i class 9 nungi 12 tashi nung classical languages agidaktsünür.
BSM -i New Education Policy (NEP) yanglutsü atema K Kasturirangan-i aniba luden nem iba dak sendakba onük kar benogo.
Lokti nung libaliroa aotsü atema sobaliba oshitem angazüktsübaji tongtipang ta parnoki bilemer.
“Iba tebilemba ya asen linük nung alirtem tangatetba ka kümdaktsütsü atema lir aser iba tangatetba ya telok aser sobaliba ajak nung lir” ta BSM tanishir Mukul Kanitkar-i ashi.
Linük nung nisung ajaki Hindi agi tongteprateptsü atema mulunga agizükra, shingaia ibaji metoktsütsü. Yamaji süra, mapa mangutsüba subject tem koba kaketshirtemi temulung magütsür, itemji school tem nung sayutsü akok” ta paisa ashi.
Bharatiya Shikshan Mandal teshimtet telok kati NEP Committee nem ‘Bharatiya Education Outline’ ta ser tezüluba ka agütsü.
“Küm pezü sentong- class 9 nungi 12 tashi nung kaketshir kati English mesüra Hindi mangazüki azüngtsü atema shimtsü maongka agütsütsü, saka kaketshir jagi Sanskrit mesüra tanga sobaliba oshi kabosa angazüktsüla” ta ‘Bharatiya Education Outline’ nung shia lir.
“Nisung kari Hindi ajanga tongteprateptsüla anungji ‘compulsory’ kümdaktsütsü ta bilemer. Ajisüaka, onoki ashiba policy nungbo Hindi ‘compulsory’ masü saka oshi ana lir- Tetsü oshi aser Sanskrit mesüra akhi tejen oshi ka aser ibaji kaketshirtemi kechi südir süaka azüngtsüla” ta Kanitkar-i metetdaktsü.