Joe Jackson arishi küm 89 buba nung süogo

Aami/June 28, 2018 (Agencies): Joe Jackson shibai Jackson 5 tentettsü aser jabaso asür Michael aser jala Janet na nüngtugu akümba nung shilem tulu agiogo, pa rasemnü arishi küm 89buba nung süogo.
Media osang ajanga ashiba agi, Jackson ya Las Vegas nung liaya liasü aser cancer agi shiranga liyar süogo.
Pa par jala jabaso 10 rongnung kar denbo tesendaktep mejungi liya aruogo saka pa tasü yipden nung alidang par kinungertem ajak pa anasa lia pa pilaogo, ta semchir Paris-i ashi.
“Ni na teti dang meimtsü,” ta par jala La Toya Jackson-i Rasemnü tweet asü.
“Nai onok nem tashi agütsü aser alima nung kibongtem rongnung nüngtugutiba ka kümdaktsüogo. Iba atema ni nü dang kanga pelar aser nü den mapang indokba kodanga mamatsü. #RIP Joe Jackson,” ta Toya-i zülutsü.
Semchir Randy Jackson Jr.-i yamai tweet asü, “ajak takoktsü kümdaktsüba chuba, yimjung nung anisüngzükang!!! Obou ni na kanga meimer.”
Jackson’er kibong ya legal battle, tenükmerem, senotsü tsütsü mangatettep aser Joe-i child molestation ken o nung Michael aitsüba agi mangatettep nung liasü.
Michael Jakson arishi küm 50buba nung asüba mapang pa indang will nung Joe mezüngoksem.
Joe Jackson ya Fountain Hill, Arkansas nung 1928, Chiteni/July 26 nü aso. Pai 1950’s mapang boxer akümtsü asoshi merangdanga liasü aser iba den külemi guitarist ka ama pa career yanglutsü asoshia merangdanga liasü. Pa Gary, Indiana nung steel plant ka nung crane operator ka ama inyaka aliba mapang nung pai par jabasotem dak kententsü aser tsüngsangtsü asoshi sempet aliba reprangtet.
Pai par jabaso tem dang ya Jackson 5 ta aja aser iba nung Michael tongti kentener asü aser parnok ya alima nung kentenba telok rongnung nüngtugutiba rongnung ka aküm.
Paisa jabaso Michael aser jala La Toya aser Janet na career kümteta aoba nung tongti shilem agia liasü.
2015 küm Jakson ya stroke asü, saka pai alima ajunga nung celebrity tem sentong balala nung shilem agia aruogo. Metsüremi/March nung pai “Precious Moments: 60 Years in Show Business” ta sür kaket ka sayaa liasü.
Jackson aser kinungtsü Katherine na 1949 küm kibong aküm aser tena jala jabaso 10 lir. Ajisüaka tena küm ishika sülen nungi balala dang lia aruogo.