Rev. Zülu Jamir sannükba mapa nungi anener

Chumukedima, June 28 (TYO) : Changtongya nunger Tsüngrem tenzüker Rev.I.Zulu Jamir, Chumukedima Ao Baptist Arogo (CABA) nung taoba küm 18 tashi sannükba mapa inyaker, pa tasoba küm agi tonger mapa nungi anenogo. Pa den tepila sentep sentong tajung ka taoba Amungnü (Aami/June 24) arogoi ayongzüka agiogo.
Rev.I.Zülu Jamir ya CABA nung mezüng ordain asüba sannüker liasü aser par arogo nung dang masü saka sannükertem telongjemtem nunga lennir ka liasü. Pai sannükba mapa den repsema Chumukedima Area Baptist Pastors Fellowship nung mendenpuba aser Dimapur Area Ao Pastors’ Fellowship nunga tir inyaka liasü. Item mapatemji repsema ABAM nunga Church Advisory Board, Mission Board aser Sanen Luden nung shilem tajung agia aruogo.
Taoba Amongnü temoatsü sentep nung par kibong den tepila sentep sentong agiba mapang, pa sannükba mapang ajuruba takok aser temoatsü ajak asoshi Tsüngrem nem tenüngsang agütsü aser maongka aser teyari anguba ajak asoshi arogo purtem dang pelaba metetdaktsü. Iba sentong nung ABAM nungi ABAM nung International Ministry Co-Ordinator, Lipok Pongeni Tsüngrem o jembia liasü.
Rev.I.Zulu Jamir sannüker asüba mapang CABA nung Prayer asem tashi lapoka arogo purtem tanüla nung ajungshitepa aru aser pa mapang nungsa tenla ki tulu aser tajung ka yangertetogo.
Pa ya Serampore College nungi B.D aser Martin Luther Christian Univeristy, Shillong nungi Christian Management nung M.A tashi azüngba lennir ka lir. Pa CABA nung metenzükdang, Changtongya Baptist Arogo nung Youth Director aser Longsa Baptist Arogo nung sannüker inyaka liasü.
Pa kinungtsü Tainla Mar, Dimapur Govt. College nung bendanga agüja inyakba tesayur tajung ka lir aser tena nem jala ka aser jabaso ka moaja lir.