U.S. Embassy melenshiba anema maneni longkak aiter

Aami/June 28, 2018 (Agencies): Tel Aviv nungi Yerusalem-i U.S. Embassy belenba anema Gaza nung longkak aitba manener.
Palestine nungertemi longkak aitba ya Gaza arrtsülen Metsüremi/March 30 nü tenzüka azüdokshia arur.
Iba azüdokshi nung nisung 100 dak tali süogo aser noklang aika yirua lir.
Monupii/May 14, 2018 anogo embassy melendang Palestine nunger 40,000 longkak ait, ta Times of Israel-i metetdaktsü. Kasa anogo kisüng nung nisung 60 tepset.
Iba anogo U.S. Consulate nung sentong ka agi aser Tel Aviv nungi Ambassador David Frieman den ketdangsür kar Yerusalem nung aliba consulate tasenbai ao.
Saka iba telemtetba nung Tir Trump-i ‘waiver’ ka nung sign süa lir, koba ajanga embassy belentsü ya ita trok atsülangtsür. Iba waiver nung U.S. tirtemi 1995 nung sign süa amshia arur.
Tel Aviv nung U.S. Embassy ya 1966 küm amenloka Israel aser Palestine nunger tsüngta telok kata nunga maden ama inyaka aru. 1995 küm Congress ajanga temzüng ka renem aser iba temzüng nung embassy ya Yerusalem-i belentsü ta shia lir, saka iba temzüng jung olen ka shisema aliba agi, iba sentong ajanga America nunger national security nung timtem agütsütsüsa lira tir-i ita trok tashi iba sentong meinyaki atsülangtsü melar.
Tir Clinton, Tir Bush aser Tor Obama nunger ajungai ita trok shia iba sentong atsülangtsü.
Tir Trump-i iba waiver nung maneni sign süogo.
Ambassador Friedman aser Yerusalem nung aliba embassy kümzüka alitsü mechi pai iba temzüng nung meyongnem agütsü, ta osang ka ajanga ashir.
Ambassador Friedman aser ketdangser kar aoba dak alaka Tel Aviv nung aliba embassy nung inyaker nisung 850 ya Yerusalem nung embassy ki tasen meyanglu tashi maotsü, aser iba ki yanglutsü ya küm toku bosa agitsü, ta USA Today ajanga ashi.
Iba sentong ajanga U.S. ya Israel aser Palestine nunger tsüngta kasa jenjang nung alir masü, saka Israel nunger tsütsüi aoba sayur, aser iba ajanga Gaza arrtsü nung longkak ait tenzük.
Iba maparen ajanga iba tesem nung aser ministry nung rara adoktsü südi, ta shisabulur, ta Triumphant Mercy nungi Nuna-i ashi. Nüburtem kanga shisabulur aser raratsü atema renema alitsü asü ta asüngdanger.
Iba tebilemtsü ya adangchi lir aser kechi arutsüar ashitsü makok, saka Middle East aser Khristanpur asoshi Tsüngrem sentong kabo alitsü amanger, ta lai ashi.
“Onoki sarasademer aser Tsüngremi Lebanon nunger kisüng atema masü saka Israel nunger asoshia sentong kabo renema alitsü südi. Pai Middle East aser Assyria ajunga asoshi sentong ka yanglua alitsü südi, anungji onoki yangji amanger,” ta Nuna-i ashi.
Gaza aser Israel nung yimjung alitsü asoshi Tsüngrem dang sarasademjang, ta laisa ayongzük.