Major Handa-i Shailja tepsettsü atema amshiba kotari Delhi police-i ngutetogo

New Delhi, Aami/June 28 (Agencies): Tawa Army Major ka kinüngtsü, Shailja Dwivedi tepsettsü atema amshiba kotari tanü Delhi Police-i ngutetogo, ta osang ka ajanga metetdaktsü.
Anogo ana tejaklen police-i, parnok ket nung tamalen pua aliba hadirji aibelensangi amshiba hadir masü ta metetdakja liasü, aser tanü ang aibelensangi amshiba hadirji (kotari) ngutetogo.
West Delhi police DCP, Vijay Kumar-i, “Onok ket nung aliba hadirji Shailja tepsettsü atema amshiba hadir masü. Tai tonglokja alisang, Major Nikhil Handa-i anogo shia onok den yazü jembir. Onoki maparen shilem 90 bo tembanga inyakogo aser taruba anogo ishika tsüngda ochi jungkai adoktsü,” ta metetdakja liasü.
Aami/June 23, 2018 nü Major ka kinüngtsü west Delhi nung tepsetba ken o nung Aami/June 24, 2018 nü arishi küm 40, Army Major ji Uttar Pradesh kübok Meerut yimti nung pua liasü.
Shailja terok rangdanger liasü, aser la tasümangji Brar Square, Delhi Cantonment area nung anguba sülen anogo ka dang lirbo police-i Major Handa apu.
Major Handa ya kibong kümer kinüngtsü den tanur ana sosema lir, aser 2015 küm Nagaland nung pai Shailja aser la kinüngbu (Army Major ka) na den metettepa liasü. Major Handa aser Shailja kinungbo naprong Nagaland nung posting aliba mapang nung parnok metettep, aser Handa-i külem Major kinüngtsüji meima liasü, ta tamalen DCP-i metetdakja liasü.