Sinlung Hills Council tentettsü lenmang lapoktsü

Aizawl, Aami/June 28 (Agencies): Mizoram state legislative assembly-i Rasemnü Sinlung Hills Council (SHC) Bill agizükogo aser iba ajanga Manipur aser Assam den aartsü len northern Mizoram kübok Hmar nunger longsoa aliba tesem nem tashi tali agütsütsü.
April 2, 2018 nü Mizoram sorkar aser HPC-D na tsüngda yimjung nung alitsü asoshi tezüngzüktepba ka yanglu aser iba ajanga küm 20 shi Hmar telungpur tebilemtsü bener aliba tembangdaktsü. Singlung Hills Council ajanga tang aliba Sinlung Hills Development Council (SHDC) melentsü, koba 1994 Cküm Hmar People’s Convention (HPC) aser Mizoram sorkar na tsüngda yimjung yangluba sülen 1997 küm Chiteni/July nung tenteta liasü.
Home minister R Lalzirliana shibai iba bill ya benoka liasü, pai state nung yimjung aser tesunep bener arutsü asoshi sorkar den teka amtepa inyakba atema Hmar nunger telungpur tenüngsanga liasü.
R Lalzirliana-i ashiba agi, iba tesem nung yimjung bener arutsü asoshi aser HPC-D pur takhangba ataloktsü atema sorkar aser HPC-D na tangatettep nung inyaktsü mulungtep. “Mezüngbo HPC-D puri autonomous district council ka khanga liasü saka tang aliba Council ang tashi itshia yanglushitsü asoshi mulunga aküm. Kasa mapang nung Mizoram sorkaria tangatettep ka dangi arutsü asoshi tali atsüanem akatsü asoshi mulungtet,” ta R Lalzirliana-i ashi.
Iba Bill nung council ya ita trok atema mezüng tenteta atatsü shia lir, aser iba sülen election agitsü. HPC-D puri council züngsem shimtsü asoshi benoka aliba sorkari agizükogo. Council Headquarters secretariat ya Sakawrdai yimtsüng mesera parnoki aginüba yimtsüng mashi ka nung amendaktsü.
SHC nung züngsem 14 agi kümtetba general council aser executive council alitsü aser züngsemtem rongnung 12 election ajanga shimtsü aser züngsem ana sorkari shimtsü. General council züngsem kati küm pongu office mapa abentsü.
SHC nung Chief Executive Member (CEM), chairman, deputy chairman aser CEM-i nominate asüba executive members (EM) 4 alitsü.
Tanga tashi dak alia SHC nem sentong balala aser scheme yanglutsüba, parnok sasa budget yanglutsü asoshi aser council tesem nung tax sarutsü asoshi tashi agütsütsü.