Surgical strikes video sayaba sülen BJP, Congress na aitsütep

New Delhi, Aami/June 28 (Agencies): Congress-i, tamalen parnokia surgical strikes ogo, ta jembiba aija tanü Bharatiya Janata Party (BJP) lenir, Subramanian Swamy-i, nenoki surgical strikes ao süra kechiba miimbanga ayu, ta asüngdang.
2016 küm Septemeber ita nung Indian Army temi Pakistan litsü nung surgical strike aoba video yashi sayaa liasü, iba sülen Congress-i, BJP-i votes angutsü atema taküm tenla agutsür sepaitem amshir, ta aitsü.
Surgical strikes onük nung BJP aija Congress lenir, Randeep Surjewala-i, Uttar Pradesh nung assembly election mapang nung votes angutsü atema BJP-i surgical strikes tenüng amshir, ta aitsü.
Tanü osangbenertem den jembidang Surjewala-i, “Ato kilonser Modi’er sorkari sepaitem aser aluyimertem omen alema inyaker aser Surgical Strikes tenüng amshia votes ayimer. Linük nüburtemi parnok dang ya asüngdanger, Atal Bihari Vajpayee aser Manmohan Singh (taoba mapang Ato kilonsertem) natia parnok yimsüsüba mapang Army operations takok anguba tenüng amshi asü?” ta ashi.
Congress lenirisa, BJP-i votes angutsü atema sepaitemi taküm tenla agütsüba tenüngji mamshitsüla, ta ashi.
Paisa, BJP-i surgical strikes atema Ato kilonser, Modi nem tenüngsang agutsür, ajisüaka iba ya Indian Army temi anguba takok lir, ta ashi.
2016 küm kiralongrartemi Uri nung army camp amakdang sepai 18 tepsetba sülen Indian army temi mangyanga Pakistan Occupied Kashmir (PoK) nung surgical strikes oa liasü.