Lisopur jenjang magütsütsü asoshi tasa asar: Ex-MLA

Silchar, Aami/June 28 (Agencies): Taoba Katigorah MLA Ataur Rahman Mazarbhuiya-i Rasemnü ashiba agi, National Register of Citizens (NRC) update amshia inyakyim kar ajanga Barak Valley nung aliba Bengali nunger nem lisopur jenjang magütsütsü asoshi merangdar.
Citizens’ Rights Protection Co-Ordination Committee puri ayongzükba sentong nung o jembidang pai ashiba agi, “onok maneni tendangra lendong adoktsü. Onok ajem ajema aliba ya tashimaitba ajanga ta kari danga bilema lir, parnok tai.”
Mazarbhuiya-i ashiba agi, küm aika tejakdang Bengali oshi atema nokdakba mapang nung parnok 11-i taküm bendanga agütsüogo aser tang Bengali nunger temeden aser kümzüka ayutsü asoshi iba amala mesükba movement ka tenzüktsü akok. Pai NRC jangjashiba mapang nung nüburtem rongrongshishidaktsüba atema Ato Kilonser Narendra Modi mapa nungi anentsütsü asoshi akhang.
Committee züngsem Kishore Bhattacharjee-i ashiba agi, “asenok lisopur jenjang wazüka ayutsü aser sobalibaa aotsü atema yimdong nung raratsü asoshi anogo ka tonga arudar. Asenok ajak longjemer ola adoktsü nüngdaker.”
Pai NRC nung Barak Valley nung alir lakh 15 shi mezüngoksemtsü amai temulung melemi bilemer aser iba dak sendakba nung parnoki Supreme Court dangi ken o abentsü sentong lir, ta ashi. Committee mendenbuba Tapodhir Bhattacharjee-i ashiba agi, “ghonda 72 sülen kechi atalokjar onoki memetet. Iba valley nung aliba nüburtem mesüngjemteti lir. Onoki Assamese nunger anema masü saka sobaliba dak ajemdaker lokti lemdangtsü meranger telok anema nokdaker.”
Karimganj North Congress MLA K.D. Purkayastha-i ashiba agi, NRC inyakyim ajanga nüburtem nem timtem agütsüogo. Iba ken o ya kanga dang tongtibang lir aser jung junga achaayanga minyakra iba ajanga lendong bener arutsütsü, ta paisa shisem.
Barak Valley nungi Assam excise & fisheries minister Parimal Suklabaidya-i ashiba agi, NRC update ya Supreme Court-i achaayanga inyaker aser chichiba lisopurtem ajak iba list nung züngoksemtsü.
Committee züngsem Sadhan Purkayastha, Sanat Koiri aser Madhusudan Kar nungera iba sentong nung dena liasü.
Kasa mapang nung National Register of Citizens (NRC) tatembangbuba draft sangdongtsü asoshi SC-i Aami/June 30 nü tatembangbuba anogo asütsü züngzükja aliba nü iba list ya mesayatettsü akok, aser State Coordinator-i SC dang anogo atsülangtsütsü asoshi shiogo.
SC-i iba ken o ya Chiteni/July 2 nü angadangtsü.
NRC State Coordinator Prateek Hajela-i Yangtepnü ashiba agi, state nung tzümetsüng lendong agi kongshir aliba ajanga NRC tatembangbuba draft ya züngzükja aliba anogo nü madoktsütettsü aser NRC ketdangsertemi SC dang anogo atsülangtsütsü asoshi mepeshiogo.
Osang tejangja ka ajanga ashiba agi, NRC ketdangsertemi Supreme Court dang NRC sangdongtsü asoshi tajemtiba agi anogo tenetbosa agütsütsü asoshi asüngdangogo, kechiyong tzümetsüng ajanga inyakyim thitemtsüogo.
National Register of Citizens (NRC) mezüngbuba draft sangdongba sülen Supreme Court-i Registrar General of India (RGI) aser NRC, State Coordinator dang NRC tatembangbuba draft Aami/June 30 nü tashi nungbo sangdongtsü asoshi tetuyuba agüja liasü.
NRC mezüngbuba draft ya 2017 Luchii/Dec. 31 nü sangdonga liasü aser iba nung Assam kübok alir nütsüng crore 3.29 nungi crore 1.90 indang tenüng dang adokja liasü.