Mizoram Assembly-i Citizenship Bill magizüker

Aizawl, Aami (June) 29 (Agencies): Brihostibarnü Mizoram Assembly-i Citizenship (Amendment) Bill, 2016 anema noktaktsü telemtetba agi.
Assembly nung iba bill atema mapang talangka olemtepba sülen Centre-i Citizenship Act, 1955 yanglushitsü merangba magizüktsü ta ashitsü atema telemtetba agi.
Iba ken o ya Home minister R. Lalzirliana-i benok aser pai ashiba agi, “iba bill ya secularism tangatetba anema lir aser agizükra Mizoram ama state tem nung timtem bener arutsü, kechiyong anameta aliba linüktem nungi nisungtem arua alitsü.”
Tang Mizoram nung Bangladesh nungi aruba Chakma nunger ajanga timtem ajurua lir.
Assembly nung adenertemi ashiba agi, iba bill ya yanglura Mizoram state nung khuret ajurutsü aser Bangladesh nungi aruba Buddhist nunger aika Mizoram nung jenoka lir.
Iba bill ya 2016 küm Parliament nung home minister Rajnath Singh-i benok. Iba bill ajanga Afghanistan, Bangladesh aser Pakistan nungi aruba Hindu, Sikh, Buddhist, Jain, Parsi aser Christian tem nem India senso agütsütsü temelaba agütsür.
December 31, 2014 matongdang India den kidangsüa aliba linüktem nung tamangba yimsü tsütsü reshikangshi nungi jena arur tem India nung küm trok aliba sülenbo India senso agütsütsü atema Citizenship (Amendment) Bill, 2016-i melar.
BJP-i aniba Centre-i Hindu nunger nem India senso agütsütsü merangba bill ka lir ta taoba mapang Mizoram Chief minister Lal Thanhawla-i shia liasü.
Centre-i Khristantem aser tanga tamangba yimsü tilatem nem senso agütsütsü tebilemba kecha mali ta paisa ashi.
Young Mizo Association aser People’s Representation for Identity and Status of Mizoram (PRISM) dena Mizoram nung NGO ajaki ibva bill magizüker.
Congress-i sorkar abenba Mizoram yutsür NPP-i sorkar kümteta aliba Meghalaya nunga taküm Monupii (May) ita bill magizüktsü atema telemtetba agiogo. Meghalaya sorkar nung BJP dena lir.
BJP-i sorkar kümteta aliba Assam nunga iba bill magizüker. Ajisüaka, tang tashi Assam sorkari iba bill atema ola madoki lir.
Monupii (May) 21 nü North East Students’ Organisation (Neso)-i Northeast ajungalen iba bill anema lungkak aitba sentong ayonga agiogo. Parnoki Citizenship (Amendment) Bill, 2016 meyipa agitsü atema takhangba agütsür.