School education dept.-i ANATG indang jangjashitsür

Dimapur, Aami (June) 29 (TYO): ANATG züngsemtemi tang lungkak aitba asoshi public-i meteta alitsü atema kuli kar agütsütsüsa akümer, ta School Education Advisor, K. Tokugha Sukhalu-i tanü ashi.
Taoba mapang Department-i ad-hoc/contract Graduate Teachers, Primary Teachers, Hindi Teachers, Drawing Teachers, Language Teachers, Lab Assistants aser PETs shim aser iba atema sorkari suitability test agitsü atema Luden ka tentettsü, ta Advisor Sukhalu-isa metetdaktsü.
Iba atema eligibility ji Luchii (December) 31, 2015 tashi nung küm asem mapa inyaka arurtem telatet agütsü. 2009 nungi 2015 tsüngda Ad-hoc employees (absentees aser taoba mapang failed candidates) ajak Suitability Test agütsüdaktsü aser iba atema Mongputeni (October) 21, 2016 nü P&AR Department-i temelaba agütsü, ta paisa ashi.
Suitability Test ji Monupii (May) 20 aser 23, 2017 anogotem agi aser Screening Committee-i Mongputeni (October) 13, 2017 nü adhoc/contract employees 1166 regularize asütsü junger ta ashi.
Külen, ACAUT & PSAN teloktemi Chiteni (July) 2017 nung ACAUT Vrs State of Nagaland & others atema Writ Petition ka benok aser okadaki Luroi (August) 11, 2016 aser Luroi (August) 4, 2008 anogotem Office Memorandum agütsübatem sota atatsü tetuyuba agütsü. Okadaki sorkar dang contract appointments ka danga regularize masütsü atema tetuyuba agüja liasü, ta School Education Advisor-isa ashi.
Sorkaribo Suitability Test ajangteter ad-hoc/contract employee ajak regularize asütsü lemtetba magieni lir. Ashiba ama Department-i kanga dang nendaka parnok regularize asütsü atema inyakdangogo saka okadak nungi tatembang oshidang ka magütsü tashibo iba mapa meinyaktettsü. Ajisüaka, ANATG züngsemtemi lumia lungkak aittsü tenzükba atema sasar, ta paisa ashi.
Sorkari Government School tesayurtemi ajuruba khurettem angateta lir saka parnoki yamai lungkak aitba atema kanga sasa bilemtsür. ANATG tesayurtemi sayuba Government School tem nung result tamajung angur saka parnoki iba atemabo tebilemtsü mabener, ta Advisor Sukhalu-isa shisem.
Kaketshirtem indang tarutsü asoshi tetsükdaktsü majurudaktsütsü aser iba tangatetbaji sensotemia hao ta agizüktsü. Onük tejangja maliba nung ajemdaker lungkak aitertem dak sorkari mapa inyaktsü menungnangtsü. Anungji, ajak ajungtsü atema lungkak aitertem lungkak aitba anentsü mepishir, ta Sukhalu-isa ashi.