Totzü company nung inyaker asem pokset

Quetta, Chiteni 03 (Agencies) : Pakistan anüolentip tsütsü totzü atsüba company ka nung inyakertem survey agiba mapang remote control amshia bomb ka poklokja idakji inyaker asem poksetogo, ta Pakistan police-i metetdaktsü.
Tanü Sangtennü/Tuesday local police official, Mohammad Hussain-i ashiba agi, Baluchistan province kübok Dera Bugti jila anasa atalokba lendong nungji ano surveyor pongu yiru.
Iba osang zülu tashi nung kecha telokia iba maparenji parnoki inyak ta kibur küma memetetdaktsü saka mapang shia province nung telungpur telok balalai yamala tashiyim maparenji inyaker. Ano Baluchistan nung Islamic telungpurtema aika lir ta angazüker.
Baluchistan kübok Awaran district nung sepai trok tepsetba sülen anogo ka dang lir tang iba tashiyim lendongji ataloker.