Nükla tasen ka tenzüktsü imlar : Richard Shelby

Moscow, Chiteni 03 (Agencies) : Russia o US na tsüngda tesendaktep yanglushitsü atema anogo aser nükla tasen ka tenzüktsü imlar, ta tanü Sangtennü/Tuesaday US congressional telok ka nung leniri metetdaktsü.
Linük ana nungi Tirtem Finland yimtiba Helsinki nung ajurutepa senden amentsü renemshiba mapang ka nung tang hopta ana jelia Alabama nungi adokba Republican Senator, Richard Shelby-i Russia Foreign Minister Sergey Lavrov den Moscow yimti nung ajurutep.
“Asenok tsüngda tesendaktep nung mangatettep adoka aliba angateta tang onok yangi aruagi lir saka US o Russia na tsüngda tesendaktep tajungba küma yanglushitsü lenmang lir. Kechiaser alima rangben atema inyaktsü asoshi maparen kar nung linük anaprong tejangrabaji kasa dang anungji asenok külemi longjemer inyaktsü teimla akar,” ta tena senden tenzüka jembidang Shelby-i Lavrov dang ashi.
Tanep Kremlin nungi otongdar, Dmitry Peskov-i ashiba agi, Chiteni 16 nü official summit metenzükdang Russia Tir, Vladimir Putin o US Tir, Donald Trump na jurila mensem ka amentsü akok.
Lenir ana tsüngda temaba jenjang nung senden amenbaji ajanga linük ana tsüngda otsü tasen ka tenzüka odaktsüner, ta Shelby-isa temulung lemteta metetdaktsüogo.