Sorkari WhatsApp dang olulu prokshiba noktangtsü tuyur

New Delhi, Chiteni (July) 3 (Agencies): Mongulbarnü sorkari WhatsApp dang osang tamajung belenshiba noktangtsü atema tekaratiba nung mapa inyakang ta tetuyuba agütsüogo.
Ministry of electronics and IT (MEITY)-i WhatsApp ketdangsertem dang “nenoki tebilemtsü abentsü aser mejenbutsü” ta ashi.
WhatsApp nung taila aser tangar anema olulutem prokshiba ajanga loktii tai maketba nisungtem tepsetba lendong atalokba mapang ka nung Centre-i iba tetuyuba agütsü.
Assam, Maharashtra, Karnataka, Tripura aser West Bengal state tem nung nisungtem tepsetba atema sasar ta shia IT Ministry-i “WhatsApp amala sabang ajanga tanen makai osang tamajung prokshiba atema tebilemtsü abener” ta ashi.
“MEITY-i item olulutem prokshiba atema süoki ia bilemer aser WhatsApp ketdangsertem dang osang sangoktsüogo. Taila osangtem aser khenkhen kar anema prokshiba osangtem noktangtsü atema mapa inyakang ta shiogo” ta sangdong ka nung metetdaktsü.
Ozüng amertemi aibelenertem aputsü atema mapa inyaktsü aser WhatsApp ketdangsertemia technology ajanga osangtem prokshiba noktangtsü atema mapa inyaktsüla ta sorkari tetuyuba agütsü.