Measles-Rubella campaign atema Kma task force senden amen

Kohima, Chiteni/July 04 (TYO): Tanü DC’s Conference Hall, Kohima nung Measles-Rubella Vaccination Campaign (MRCV) atema District Task Force senden Deputy Commissioner aser Chairman, District Task Force for Immunization, Kohima, Rajesh Soundararajan, IAS leniba nung menogo.
District aser state nung Measles- Rubella Vaccination campaign takok angutsü atema Chairman aser DC Kohima-i line departments, Schools/Institutions, stakeholders aser MR Vaccination nung tanga tentettem dang amalitepa inyaktsü aser peipei tesem nung yaritepa inyaktsü ayongzük.
Paisa line departments dang tanurtem züngdangba survey agidang amalitepa yariteptsü ayongzükba den külemi survey agidang schools, Angawadi Centres amala nung tanur ka tenüng anaben tashi züngsemba mita reprangtsü metetdaktsü.
District Programme officer RCH/VIP, Dr. Rupert Peseyie-i October 3 nungi tenzüka Nagaland nung agitsü aliba Measles-Rubella vaccination campaign indang tongmelang agi metetdaktsü.
Pai ashiba agi, India linük nung Measles samatsütsü aser Rubella azüoktsü nükjidong nung linük tesem ajaklen iba campaign ayonga agir.
2015 küm nütsüng azüngba osang nung ajemdaker, Nagaland nung shilem asemsü nungi shilem kabo tanurtem lir, ta shia Dr. Peseyie-i, iba campaign mapang nung tanur lakh 7 nem vaccine agutsütsü, aser iba nungji Kohima district kija nunga tanur 90,000 densema lir, ta metetdaktsü.
Paisa, tanur arishi ita 9 nungi arishi küm 15 tsüngdapurtem nem MR vaccine agutsütsüla, ta metetdaktsü.
Measles ya menatepba viral infection ka lir aser tanurtem atema kanga lendong keta lir aser Rubella ya-a viral infection ka lir, ajisüaka vaccine agutsüba ajanga itemji nokdangtettsü, ta paisa ashi.
Chief Medical Officer, Kohima, Dr. Ritu Thurr-i, India sorkari 2020 küm tashi nungbo Measles-Rubella samatsütsü nükjidong yur inyaker, anungji senso shiai iba campaign nung akokba tashi yariteptsüla, ta ashi.
Dr. Seema Singh Koshal, RRT-WHO-i, linük nung state 20 nungbo iba campaign takok ngua agitetogo aser Nagaland nunga takok ngua agitettsü imlar, ta ashi.
Laisa, state nung iba campaign ya hopta 5 agitsü aser mezüngbuba hopta anaji schools aser Institutions nung, tasembuba aser pezübuba hopta nung community facility centres nung aser tatembangbuba hoptaji vaccine magi aliba tanurtem asoshi alitsü, ta metetdaktsü.
Kasa senden nung Project officer- UNDP, Rajesh Khastu Monsang-i United Nation Development Programme (UNDP) teinyaktsü shilem aser iba campaign atema Kohima nung Vaccine Store jenjang metetdakja liasü.