AIMC-i Nagaland nung Project Shakti tenzük

Dimapur, Chiteni (July) 4 (TYO): All India Mahila Congress-i tanü Nagaland nung Project Shakti tenzük.  Congress Bhavan, Dimapur nung agiba sentong nung AIMC Secretary, Incharge of Nagaland Kim Haokip aden.
Sentong nung Kim Haokip-i ashiba agi, Project Shakti ya Congress Mahila mapa inyakertem aser party central leadership tsüngda tesentaktep yanglutsü atema sabang ka lir.
Iba mapatong ajanga linük kübok Booth, block, village, town aser district shia dangi Congress ola atongtsü aser külen party mahila mapa inyakertemi party central leadership den tesentaktep yanglutsü atema lir, ta Kim-isa metetdaktsü.
Congress Tir Rahul Gandhi-i iba mapatong nung temulung agütsür aser party central lennirtem o teküpoktiba jenjang nung mapa inyakertem tsüngda tetsüngda malitsü atema meranger, ta laisa ashi.
Congress indang Project Shakti kübok züngsemtsü atema inyakyim asem lir aser ibaji phone number ka ajanga asütsü akok. Iba mapatong ajanga Mahila party inyakertem ajiteteter aser mapang shia party central lennirtemi reprangshimtsü, ta Kim-isa metetdaktsü.
Laisa Project Shakti tenzükba sentong nung adener ajak dang pelaba metetdaktsü aser Mahila züngsemtemi taruba Lok Sabha election atema mapa inyaktsü ayongzük.
Sentong nung Nagaland Pradesh Mahila Congress Committee President N. Lucy-ia Project Shakti indang osang tatsü agi lemsatep aser AIMC Secy. Kim Haoki den tesentepertem ajak dang pelaba metetdaktsü.
Sentong nung mendenji Dimapur District Mahila Congress Committee (DMCC) tir Sentila Imchen liasü.