Neiphiu Rio-i June 12 nü jembiba onük jangjashitsür

Dimapur, Chiteni (July) 4 (TYO): Aami (June) 12, 2018 Nagaland Chief Minister Neiphiu Rio anir teshimtet telok kati New Delhi nung Union Home Minister Rajnath Singh aser India sorkar ketdangsertem den ajurutepba sülen osangbenertem den jembiba osang belenshiba atema Rio-i tanü kuli kar agütsü.
Naga nunger aliba tesemtem ka akümtsüba indang tebilemba asüngdang India sorkari pa dang ashiba ama dang pai langzü, ta tanü Rio-i ashi.
Tesüiba küm 21 tashi olemtepyonga arur aser Naga nungertemi tekaratiba nung Naga yimten latetdaktsünür, ta paisa metetdaktsü.
Naga nunger aliba tesemtem ka akümtsü akhangbaji tim dang aser India sorkaria iba takhangba agizükogo. Olemtep nung iba onük jembi aser ni jembibaji kü tebilemba mesüra NDPP mesüra PDA sorkar indang tebilemba masü. June 14, 2018 nü kü indang office-i aser ano June 15, 2018 nü NDPP-ia iba osang jangjatsüogo, ta Rio-isa sangdong nung shia lir.
PDA sorkari Indo-Naga yimjung olemtep nung teyariteper ka ama shilem agitsü nangzüka lir. Onoki iba mapa nung maneni yariteptsü aser amalitep alitsü. Ni küm aika Naga yimten tebilemtsü atema inyaka arur aser iba ajanga kü tangatetba sayur. Onoki Naga yimjung olemtep aser ka akümtsüba tangatetba nungi mepila aser Naga nungertemi taginüba den külemi noktaka lir, ta Nagaland chief minister-isa metetdaktsü.
Media nung tai belenshiba ajanga ni jembiba olen nisung karidang aibelena angateta lira, iba sangdong ajanga shitakba osang jangjatsütsü ta imlar. Naga nunger kibong ka akümtsü atema nisung ajaki yariteptsü aser asen nübortem atema yimjung bener arutsü atema longjemtsü ayongzüker, ta Rio-isa ashi.