Nagaland nung sorkar mapa inyakertemi RTI teimba amshir

Kohima, Chiteni (July) 4 (TYO): Nagaland nung Right to Information (RTI) Act, 2005 ya sorkar mapa inyakertemi teimba amshir.
Annual administrative report 2016-17 nung shia aliba ama Nagaland State Information Commission ya March 2006 nung tentet aser March 31, 2017 tashi nung applications 24,896 aruba nungi 22,954 asoshi telangzüba agütsü.
Ajisüaka, RTI application teimbaka sorkar mapa inyakertemi service dak sendakba asüngdangba lir, ta Administrative Training Institute, Nagaland Deputy Director (Training), Hovithal N Sothu-i ashi.
Directorate of School Education nung joint Directors, Deputy Directors, Assistant Directors, PIOs, APIOs, Superintendents aser Assistant Superintendents atema RTI sensitization sentong nung Sothu-i iba osang metetdaktsü.
“Nagaland nung public-i RTI Act mamshir saka sorkar mapa inyakertemi ang service dak sendakba atema amshir” ta pai ashi.
India Linük Temzüng nung Arrla 19(i)(a) ajanga RTI ya temeten ka lir aser sorkar department kati Public Information Officer (PIO) meshrmra, pa/la ji PIO ama akümer, ta Sothu-isa metetdaktsü.
Education directorate nung ketdangser aika jenjang ajungkettsü mapang tongogo aser iba jagi sensitization workshops ya kanga tongtipang lir, ta School Education Department Principal Director, Smita Sarangi-i ashi.
RTI ya temeten ka lir aser iba Act kübok osang metetnüa asüngdangba atema telangzüba agütsütsüla, ta laisa ashi.
Iba workshop agiba ajanga Directorate nung mapa inyaktsü shimba ketdangsertemi ketdangsübaren tejangjaba nung metettsü imlar, ta Smita Sarangi-isa shisem.