Loktiliba ka indang tamendakdakji shisaliok lir: PB Acharya

Dimapur, Chiteni (July) 4 (TYO): Terenlok loktiliba ka indang tamendakdakji shisaliok lir aser shisaliok rejutem ya loktiliba atema tongtiret ama lir, ta tanü Nagaland Governor PB Acharya-i ashi.
Chiteni (July) 4, 2018 Mereima Campus nung Nagaland University ketdangsertem den ajurutepa sensaksemdang PB Acharya-i iba olen jembi.
Lanurtem nem shisatsü agütsütsüla saka ibaji parnok agitsü atema dang masü saka parnok jenjang ka atongba sülen lokti nem meyipa agütsütsüla. University temi kaketshirtem nem iba tangatetba sayutsüla aser shisaliok indang tongti alizüngji loktiliba tashi itdaktsütsü aser renloktsü atema asütsüla, ta Nagaland Governor-isa ashi.
University curriculum nung Skill Development course tem agitsüla. Sorkar sector nung mapa mali kümogo aser lanurtem University toktsüba sülen entrepreneurs küdaktsütsüla ta Governor Acharya-isa ayongzük.
University Grants Commission (UGC)-i adokba scheme- “Introduction of Career Oriented Courses in Universities and Colleges” ajanga undergraduate level nung career aser market oriented, skill enhancing add-on course tem agitsü alizüng lir. Iba ajanga kaketshirtem mapa angutsü, pei sasa aayangtettsü aser tashi aittsü tajangzük angur, ta paisa ashi.
Nagaland tejakleni odaktsütsü atema asenoki loktiliba akangshitsüla. Centre aser State sorkartemi scheme aika tenzüka lir saka welfare programmes aika tatongtsüpur tonga maoer. Anungji University ketdangsertem aser kaketshirtemi mapang shia yimtsüngtem semdanga Central aser State Flagship Programme tangutsüpurtem jangjatsü nüngdaker, ta PB Acharya-isa ayongzük.
India Tir-i Governor tem dang mapang shia State University nung VC tem den senden amentsü aser University Social Responsibility (USR) atema ajungmesotsü tayongzükba agüja lir, ta paisa shisem.
Tanü agiba sentong nung Nagaland University Vice Chancellor, Prof Pradeshi Lal-i tesentepertem pela agizük aser Pro VC, NU Prof RC Gupta-i anküp tepela o jembi.