Ganga ayong menenba onük nung Congress-i sorkar aitsü

New Delhi, Chiteni/July 05 (Agencies): National osangkaket ka nung Ganga ayong kanga menenba osang ka adokba nung ajemdaker tanü Congress Party lenir tain, Ahmed Patel-i Ato kilonser, Narendra Modi-i aniba Centre sorkar aitsüogo.
Congress MP, Patel-i twitter ajanga, Varanasi nung Ganga ayong menenbaji 2014 küm dang nungibo aiben agi tang temenenba, ta metetdaktsü.
“2014 küm parnoki (BJP) Ganga ayong merüktettsü ta nangzüka votes angu. Parnoki Varanasi aser linük nüburtem dang tatok meshitsü masü no?,” ta Patel-i asüngdang.
Varanasi ya Ato kilonser, Narendra Modi indang Lok Sabha menden lir.
India Today osang ajanga ashiba agi, Varanasi nung aliba Malviya apu nungi Ganga ayong nung tzü samples tendangba ajanga tzüji 20 ben agi tang temenenba lir, ta jangja.
RTI telangzüba ka nung Ganga Rejuvenation Ministry-i, yimti (Varanasi) nung fecal coliform bacteria ajanga menenbaji shilem 58 agi timba kümogo, ta metetdaktsü.
Tzü millilitres 100 nung coliform microorganisms 2500 lira ibajibo tzü chigotsü atema majung.
Temeshi ayong, ta züngshiba Ganga ayong tesem aika nung tzü nung aliba shiruru tasümang aser tanga jana-ona jenti angur. Kilometer 2,500 talang ayong tesem aika nung jana-ona ajanga tzü kanga menena lir.