Taxi Association pur atema orientation sentong agi

Dimapur, Chiteni/July 05 (TYO): Department of Tourism ajanga Chiteni/July 05, 2018 nü Directorate of Tourism indang conference hall nung Taxi Association pur atema anogo ka orientation sentong katsüogo.
Secretary Tourism, Mhabemo Yanthan-i iba sentong tenzüka jembidang, Nagaland ya raliwalir atema tongtibang tesem ka kümogo, anungji nüburtemi yimya tajungtiba nung bendanga agütsür tenzüktsüla, ta ashi. Tourism department-i iba ama maongka agütsüdang nisung shiai shilem agia rongsenketsüng temaba jenjangi ajungkettsüla, ta pai ashi. Rongsenketsüng temaba jenjangi ajungketba ya yimtsüng aser tesem balala nung raliwalir asoshi tongtibang tesem nungi tenzüker, ta paisa shisem.
Maneni paisa Tourism Department, taxi, bus aser tanga driver union aser loktitem dang angatettepa tourist guide aser driver ka ama inyaktsü ajungshi. Driver ka mapaji gari nung amener parnoki onüba tesem tongtsüba kisüng masü saka chiyongtsü anguba, anisüngzükdak tesem tajungtiba metetdakja tourist spot tongtibangtem sayutsüla, ta pai ashi.
Raliwalirtemi mezüng taxi driver den tongteprateper aser parnoki tongtibang shilem agir, ta Secretary-isa shisem.
Iba sentong ya Deputy Director, Veyielo Doulo-i ketdangsüa agi. Iba sentong nung Addl. Director (HoD), Akhale Vizo, NTA Vice President, Kejaroko Pieru, Dy.SP Traffic, Seyiesezo Peseyie, NTA Tir, David Angami, Sr. DTO Kohima, Yaongsanglee Chang aser Tourist Officer, Khekishe Kapo nungeria jembia liasü.