Nagaland tatartem tenangzükba sentong anaben agi asü ? : PDR

Kohima, Chiteni/July 05 (TYO): 2018 küm March ita nung 13 buba Nagaland Legislative Assembly (NLA) akümtsü asoshi MLA-tem tenangzükba agiba sentong asoshi sen agizükba nung tashishitsü keta aliba osang ka mulungtet telok ka tenüng agi, People for Democratic Rights (PDR)-i metetdaktsü.
Expenditure ‘A’ Branch of Finance Department, Government of Nagaland-i Rongchii/April 12, 2018 nü Demand No 26 – Civil Secretariat vide NO:FIN/EXA/DA/GAB/2018-19/TO-200 kübok sen 25,02,000/- atema Drawal Authority No 03 agutsü; Drawal Authority (DA) copy ka People for Democratic Rights (PDR) ket nung lir, aser iba nungji DA ji Rongchii/April 20, 2018 tashi ‘valid’ ta shia lir, aser DA ji Civil Secretariat nem agütsüba liasü, ta tanü PDR Acting Chairman aser Search Committee Convenor, Ihoto Shohe-i sangdong ka nung metetdaktsü.
“13buba NLA atema tenangzükba agiba sentongji Metsüremi/March 8, 2018 nü Kohima Local Ground nung agi; tesüiba mapangtem nungbo tenangzükba agiba sentongji Raj Bhavan, Kohima nungsa agia liasü, saka tanbo nüburtemi kulisüa yimjak nung agiba “public swearing-in ceremony” ka liasü,” ta sangdong nung shia lir.
“Anungji PDR-i Finance Department dang, nüburtem dang tenangzükba sentong ana- Metsüremi/March 7 aser 8 anogo na nung agi asü, ibaji metetdaktsütsüla; Metsüremi/March 8, 2018 nü agi süra kechiba ano DA ka agutsü, ibaji Finance Department-i jangjashitsütsüla,” ta kasa sangdong ajanga metetdaktsü.
“DA nung ashishia asüngdangtsü nüngdaker, kechiyong iba nungji public sen dena lir. PDR-isa Civil Secretariat dang, 13buba NLA atema Metsüremi/March 7, 2018 nü kong aser koba ama tenangzükba sentong ka agi, aser iba atema DA ji koma ser agizüka liasü, ibaji metetdaktsütsüla,” ta kasa sangdong ajanga metetdaktsü.
Ano Media & Publicity Affairs PDR-i sangdong ka ajanga, People for Democratic Rights (PDR)-i Search Committee ka tentet aser iba committee nung Convenor ji Advisor to PDR, Ihoto Shohe lir; ibaji PDR Chairman tasen (tamasabo convenor ta jaa liasü) shimtsü atema liasü, kechiyong Convenor teinyakdak, Hukato Zhimo-i PDR dang pa nija timtem kar nung ajemdaker sodi meshi, aser pai sodi meshiba ama PDR-i pa nem sodi agutsüogo, ta metetdaktsü.
Chairman tasen ka meshim tashi PDR-i PDR acting Chairman inyaktsü atema Advisor, Ihoto Sema nem nungloktsü, ta kasa sangdong ajangasa metetdaktsü.