Tanela agi sünga liang – Efesa 5:18

Tanela agi sünga alibaji ochi lir aser ibaji sayutsüngiren dang aliba arogo ka samadoktsü lendonga lir. Iba tanela temeshi nübu aser Pai tenzükba mapa nung mejangjaba ajanga adoktsü akok. Putu ka shi tesayurtemi O tetezü nung ammeter tamanger taküm nung tanela temeshi mapa sayu. Kari tamangertem dak tanela temeshi-i mapa inyakba Lairen ochibaji tai ratettsü. Nübusen aser tanela temeshi mapa indang sayutsüngibaji nüngdaka lir. Lairen tesayuba nungi pa mapa indang ratettsütsü tenüngdaktsü lir. Tanela mapa kanga kümdanga ratettsü tenüngdaktsü.
Tanela agi sünga alibaji kar nem dang sempet balaka agütsüba masü, saka ibai tamanger ajaki anogo shia mapa nung metetta alitsüba mapa lir. Tekümtet agizükba mapang Tanela Temeshiji tamanger shia dangi aita alir. Tamangi Khrista dak lidaktsür aser kangki nung Pa mapa aser Pa shia arubaji tanelaren temoatsütem kimong lir. Tsüngremi tekümtet mapa inyakba nung tongtipang kaji Tanela Temeshi yokbaji lir. Shiba dak tanela mali, paji Khrista meyong masü ta Pauli Rom 8:9 nung zülu.
Tanabuba, Tanela Temeshi mapaji tasen tamangertem Khrista temang nung baptitsübaji lir. Alima ajunga nung amangba ajanga iba mapa maneni ataloktsür. Ibai ajanga tamanger ajak Khrista temang Kibuba Yisu den lungjemdaktsür. Kodang iba mapa ataloktsüdir tamangertem meshitettsü aser Tsüngremer kibong nung tenzüker akümtsü tekümtet temaitsü ajener.
Kodang tamanger dak Tanela Temeshi nem teti talidak agütsüdir, iba nisung mapa ajak Pai azüoktsü. Sünga alibaji tamanger mapa nungi adoker. Mezüngbuba, temenen nungi temulung meyipba. Tanabuba, ni kechi ajak bendanga agütsüa Tanela Temeshi-i azüokdaktsüba. Tasembuba, Tanela Temeshi-i Tsüngrem tenangzükbatem atalokdaktsüba metetta Tsüngrem nem tenüngsang agütsüba. Pezübuba, Tanela Temeshi shibai kü taküm sünga lir pai kü telemtetba aser mapa ajak azüoker ta amanga tamang agi inyaktsüla. Iba nungi adokbaji Tanela Temeshi ajanga ain aser Khrista adenba tejangja nung Tsüngrem mapa inyaktsüla.