J&K nung sepaitemi civilian 3 khaset

New Delhi/Srinagar, Chiteni/July 07 (Agencies): Tanü Jammu & Kashmir kübok Kulgam district nung security sepaitemi longkak aitertem dak injang khaloktsüdang aiür ka densema civilian asem khaset, ta police osang aser TV channels osang ajanga metetdaktsü.
Osang angazükba agi, Redwani tesem nung army patrol amakba ajanga security sepaitemi injang amshitsüa akum. Tanü iba tatalokba sülen Kulgam aser Anantnag district na nung mobile internet services anentsüogo.
Kulgam kübok Hawoora Mishipora yimdak longkak aitertem aser sepaitem tsüngda rara adok, ta police ketdangser kati metetdaktsü.
2016 küm Hizbul Mujahideen commander, Burhan Wani tepsetba sülen asüng (Amongnü) pa sür küm ana ajungba anogomong jelia tanü Kashmir tesem aika nung security akhangshiogo, ta kasa osang ajanga metetdaktsü.
Tral township, Pulwama district, Srinagar kübok Nowhatta aser Maisuma police station tesemtem nung security akhangshiogo.
Hizbul Mujahideen commander, Wani ya Tral nungi liasü aser 2016 küm Chiteni/July 8 nü south Kashmir, Anantnag district kübok Kokernag tesem nung sepaitemi pa khaset. Pa khasetba sülen Kashmir tesem aika nung longkak aita tensa mejungi akum, aser iba mapang nung nisung 85 asü aser meyirjang aika yirua liasü.