BPL tribal kibongtemnem janga kg metsütsü agütsütsü

Agartala, Chiteni/July 7 (Agencies): Tripura nung tribal blocks 10 kübok lisopur below poverty level (BPL) nung alir kibongtem nem state sorkari angati agi janga kg metsütsü (20) agütsütsü.
State secretariat nung osangbenertem den sensaksemba mapang nung Nath-i ashiba agi, sorkari lisopurtem nem takok tashi teyari agüja parnok state nung tanga lokti tem den jenjang kasai anir atutsü asoshi teyari agütsütsü.
“State kinüng nung aliba tribal nisungtem tzünglurowa nung kanga kangshir. Onoki tribal blocks 10 bushitetogo, kong lisopur below poverty level (BPL) nung alir kibong shia nem state sorkari ita ana angati agi janga kg metsütsü (20) agütsütsü,” ta pai ashi.
Iba telemtetba ya Yangtepnü cabinet senden nung agi aser iba ajanga Chamanu, Damcherra, Dashda, Damburnagar, Karbook, Mungiakami, Raishyabari, Rupaichari, Silachari aser Tulashikhar blocks nung alir lisopur kibong 61,058 ajangzüktsü.
Minister-isa ashiba agi, Antodaya Annapurna Yojana ration consumers shirnok public distribution system (PDS) guidelines nung aliba ama jang kg 1 nung sen anana agi ngudar, iba yaa maneni kasa dang asütsü.
Iba dak alia PDS nung kübok “priority groups” nung züngoksema alirtem nem taoba mapang nung agüja aliba ama ita shia sen anana agi jang kg 5 agütsütsü aser iba den jang kg 20 ya angati agi tzünglurowa ita ana nung ya agütsütsü.
Iba sentong asoshi jang talila kg 2,442 nüngdaktsü, ta ashiba den Nath-isa ashiba agi, iba sentong ya taküm asoshi dang asütsü.
Taruba küma iba sentong ya benoka inyaktsü asü, ta asüngdangba mapang nung Nath-i, iba telemtetba yabo cabinet nung magi, ta ashi.