Uttar Pradesh nung tzünglu sashia arur, nisung 27 süogo

Lucknow, Chiteni 27 (Agencies): Uttar Pradesh tesem balala nung tzünglu kanga sashia aruba ajanga nisung 27 tashi süogo, ta sorkar otongdar kati Rogonü ashi. Tzünglu tesashi maneni state nung tesem aika nung arutsü südi, ta MET office ajanga ashir.
State tesem balala nung Yangtepnü nungi tenzüka tzünglu kanga sashia aruba ajanga nisung 27 süogo, ta otongdari ashi.
Agra nung nisung pongu asü, Mainpuri nung nisung pezü asüba osang aru, Muzaffarnager aser Kasganj nung nisung asem-sem, Meerut aser Bareilly nung nisung ana-na aser Kanpur Dehat, Mathura, Ghaziabad, Hapur, Jhansi, Rae Bareli, Jalaun aser Jaunpur nung nisung kaka asü, ta ketdangseri ashi.
State tesem balala nung nisung 12 yiru, ta paisa shisem.
Chief Minister Yogi Adityanath-i ketdangsertem dang teyari balala agütsüba mapa tenzüktsü tetuyuba agütsüogo aser ki chirepba lira temzüng nung aliba ama district magistrate tem dang senotsü teyari agütsütsü shiogo.
Chief Minister-isa ketdangsertem dang yirua alirtem nem nüngdakba teyari agütsütsü shiogo aser teyari agütsüba maparen nung atsüngzüka aliba ketdangsertem nem tatok magütsütsü, ta metetdaktsü.
Southwest monsoon ya Uttar Pradesh anüdoklen kanga yakyaka lir aser anülulen tsütsü tashi itta lir, anungji tesem timba nung tzünglu tesashi arutsü, ta MET office ajanga metetdaktsü.
Anogo ana tsüngda tzünglu Mathura nung cm 19, Kasganj nung cm 18, Aligarh nung cm 13, Gautam Buadh Nagar nung cm 10, Barabanki, Badaun, Saharanpur aser Firozabad nung cm 9, Ravidas Nagar aser Gorakhpur nung cm 8 aru, ta ketdangsertemi ashi.