Rijiju nem D Litt naroküm agütsü

Bordumsa, Chiteni (July) 27 (Agencies): 2012 nung lapokba nija university Arunachal University of Studies, Namsai-i MoS Home Affairs Kiren Rijiju nem Honoris Causa Doctor of Literature Award agütsüogo.
New Delhi nung sentong ka agidang parnoki Rijiju nem iba naroküm agütsü.
University nung Pro-Chancellor Vishva Lochan aser Vice-Chancellor Prof V K Kawatra nati aniba teshimtet telok kati pa nem iba sempet agütsü.
“Iba ya pungmang ka asangsang nung atalokba ama lir aser iba ana shisaliok reju ka nung nia densemba atema kanga pelar. Ni akokba tashi iba University renloktsü atema yariteptsü” ta Rijiju-i ashi.
“Iba university ajanga state nung higher education tajungba kümdaktsür aser tarutsü anogotem North East o Arunachal Pradesh nung rongsenkettsüng jenjang tajungba kümdaktsütsü” ta paisa ashi.
Namsai nung aliba university ketdangsertemi Rijiju dang ashiba agi northeast nung higher education tsütsü iba University tuluba kümogo aser kanga renloker.
“Arunachal Pradesh nung 1970 küm iba ama reju aser centre tem ali asübo tang shisaliok jenjang ya tajungba kümer lila” ta Rijiju-ia ashi.
“Eastern Arunachal Pradesh nung UGC recognized University ji Arunachal University of Studies dang lir aser iba reju ajanga shisaliok tsütsü konang aika bentsür aruogo” ta paisa shisem.
University nung Pro-Chancellor Vishva Lochan-i ashiba agi, Namsai nung aliba Arunachal University of Studies ya quality education indang reju ka lir.
Iba reju ya Namsai atema dang masü saka anameta aliba Changlang, Lohit, Tirap, Longding district tem nungi kaketshirtem atema lir. Iba temeket nung alirtem school education aser higher education atema tangaleni moi idaki züngtettsü, ta Vishva Lochan-isa ashi.