Khezhakeno yim ‘LED lighted village’ ta sangdongogo

Kohima, Chiteni/July 27 (TYO): Tanü Chuketshe society den Kezhakeno village council nati Khezhakeno village council hall nung sentong ka ayongzüka, Khezhakeno yim ‘LED lighted village’ ta sangdongogo.
Lokti pelaa agizükba o jembidang Medovelo Sono-i, “Transformers maneni raksaba aser yimdak load shedding aliba ajanga light power tajemba atsüktsü nükjidong nung onoki 100% LED lighted village mapatong ya yaküm July ita nung tenzük,” ta metetdaktsü.
“LED agi melenba sülen power atsükba kanga ajema tamalen 2250000 watts tsüka aliba nungi tangbo 20200 watts shi dang atsüker, aser ibaji yimtsüngi alizüng tulu ka tongtetba lir,” ta paisa shisem.
Kasa sentong nung DC Phek, Orenthung Lotha, NCS-ia iba mapatong tenzüka 100% LED village ajangzüktetba atema yim aser Chuketshe society nem tenüngsang agutsü.
Paisa, yimtsüngtem terenlok atema India sorkari tenzükba flagship programme 41 lir, aser itemji ajanga jilatem agutsüba ama faclilities agutsütsü, ta ashi.
Paisa, district nung ano EAC post aika adoktsü, ta metetdaktsü.
Khezhakeno yim ‘LED lighted village’ ta sangdonga Phek DC-i Certificate of commendation agutsü.
Kasa sentong nung President CPO, Kekhwengulo, VCC, S. Kepfhelhou Ladu, Addl. Secretary & Addl. Director ATI, Kevekho Kevin Zehol, NCS aser TPO President, Timikha Koza, Advocate nungeria o jembia liasü.
Kasa sentong nung Pastor, KCRC Dikha Sono-i sarasadem, Mvuko Koza-i ken aten aser D. Neingolo Koza den troupes-i sobaliba ken ka aten, aser tatemsa Pastor KBC, Khupo Koza-i sarasadema sentong tembanga liasü.a