Dimapur nung ‘Anti Dengue’ indang sentong agi

Dimapur, Chiteni (July) 27 (TYO): Anti Dengue ita amungba tenüng nung Chiteni (July) 27 nü National Vector Borne Disease Control Programme (NVBDCP), Dimapur-i Chief Medical Office (CMO) aser Dimapur Municipal Council (DMC) den yaritepa sentong ka ayongzüka agi.
Sentongji Town Hall Dimapur nung agi aser lokti balala nung lennirtem, NGOs aser sendaktepba aliba department ajak aden.
CHISR Consultant, Dr Rohan-i dengue tashidak indang metetdaktsüdang, “dengue tashidak ya dengue virus ajanga adokdaktsür koba Aedes merla ajanga menateper,” ta ashi.
Dengue agi shirangertem temang kanga metaa shiranger, tenük telonglen angor, shi tetsü aayanger, temang ajaklen mesaker aser iba tashidak atema treatment balaka mali, ta Dr Rohan-isa ashi.
Dimapur nung 2017 küm nisung 357 dak dengue agi shirangba putet aser November 2017 nung teimba puteta liasü, ta paisa shisem.
Dengue agi shirangba yimya kar danga ajitetra, tekaratiba nung doctor den ajurutepang aser District Hospital Dimapur nung azü tendangang. Dengue atema azü tendangtsü authorized centre ji DHD ya dang lir, ta paisa metetdaktsü.
Tanü sentong nung adenertemi kilentzü ayimdak aser temeket merükmejua ayutsü, Nagaland nung October 3, 2018 nungi Measles-Rubellea vaccination campaign nung shlem agitsü aser iodise asüba metsü dang achitsü telemtetba agi.
“Dimapur municipal kübok senso ajaki August nungi November 2018 tashi Honibar shia pei pei kidang tzü tamajung atsüngdena aliba endoktsü atema lokti nübodoka mapa inyakba nung shilem agitsü metetdaktsür” ta Dimapur Municipal Council (DMC), Administrator, Moa Sangtam-ia ashi.
Pei pei ki telongtet nung tzü atsüngdena aliba endoktsüla. Iba mapa ya village GBs-i ketdangsüa inyaktsü nungloktsür aser tzü atsüngdena aliba ngura sen 100 senchi achitsü atema GB tem nem tashi agütsür, ta paisa metetdaktsü.
Sentong nung Assistant Director (UVBDS) Kiko Kheiya-i dengue noktangba aser adokdaktsüba onük jembi aser (CMO) Dimapur K Vikato Kinimi-i anküp tepela o jembi.