Karunanidhi maneni ICU nung yaridar; TN CM-i pa semdang

Chennai (Tamil Nadu), Chiteni/July 30 (Agencies): DMK tongti lenir, M Karunanidhi tanü agi anogo asemnübuba Chennai nung aliba Kauvery Hospital indang ICU nung yaridar, aser tanü Tamil Nadu Chief Minister, K Palaniswami aser deputy Chief Minister, O Panneerselvam nati pa amongba hospital semdanga liasü.
Karunanidhi ajuruba sülen hospital kima osangbenertem den jembidang Palaniswami-i, “DMK tongti lenir temang tajungba lir. Medical team kati pa yaridar. Kü den deputy chief minister O Panneerselvam aser DMK party working Tir, M K Stalin aser Rajya Sabha MP, Kanimozhi nungeri pa semdangogo,” ta metetdaktsü.
Law minister, C Ve Shanmugam densema state minister tema Chief Minister den hospital jagi ao.
Yasüng Kauvery Hospital medical osang ajanga, “DMK Tir, M Karunanidhi temang tamajungba akum. Pa nem active medical support agütsüba sülen tajungba kümdar. Mongin doctor tem team-i pa maneni yaridar,” ta metetdakja liasü.
Ano külen DMK nung inyakertem jenti hospital kimaji adenshia lir. Police-i hospital tesem nung nisung madenshitsü metetdaktsüba den külemi party lenir, Stalin-ia party nung inyakertem dang police den amaliteptsü tetuyuba agütsüogo, ajisüaka party nung inyakertemi tashi mangai hospital kima adenshir, ta osang angazüker.
Yasüngbo Police-i ajok amshia lokti meinshia liasü.
Küptoknü/Honibar anepongi Karunanidhi blood pressure kanga ajema akumba sülen pa hospital jagi anir oa liasü.