Mizoram Medical College nungs class tem yakta agi tenzüktsü

Aizawl, Chiteni July 30 (Agencies): Mizoram nung mezüngbuba medical college, Mizoram Institute of Medical Education & Research (MIMER) indang mezüngbuba batch class tem Luroi/Aug 13, 2018 nungi tenzüktsü, ta MIMER Director Dr. Lallukhum Fimate-i sangdong ka ajanga metetdaktsüogo.
Mizoram Institute of Medical Education & Research ya Mizoram nung mezüngbuba medical lir aser iba ya Mizoram sorkari State Referral Hospital, Falkawn nung Centre teyari ajanga amenok. Iba college amenokba nung sen lakh 189 indokogo koba centre-i shilem 90 aser state-i shilem 10 indoka liasü. MBBS course tem tenzüktsü atema temelaba ya Monupi/May 22, 2018 nü Medical Council of India tetuyuba nung India sorkar Ministry of Health & Family Welfare-i agütsü.
College nung kaketshirtem National Eligibility & Entrance Test ka ajanga züngoksemogo. Küm shia iba college nung kaketshir 100 züngoksemtsü aser iba nung shilem 15 General Category atema, shilem 10 NRI aser shilem 75 local kaketshirtem atema mekazüka toktsütsü.
MIMER Director Dr. Lallukhum Fimate-i ashiba agi, tang tashi nung kaketshir 70 tashi züngoksema lir aser parnok 70 rongnung tenet NRI category nungi lir aser tanungba menden 30 ya Centre nung quota dak sendakba nung ken o okadak benoka aliba bentetba sülen yakta süngdaktsütsü.
Dr Fimate-isa MIMER ya Mizoram, Chief Minister Lal Thanhawla-i class metenzük tsüngda officially lapoktsütsü, ta ashi.
Maneni Director-i, Mizoram medical college atema tenüngdakba infrastructures ajak amenokogo ta ashiba den library ka amenokba dena metetdaktsü, kong kaket 1700 inokja lir.