Assam NRC final draft nung nisung lakh 40 mezüluok

New Delhi, Chiteni (July) 30 (Agencies): Kanga dang yongya aliba National Register of Citizens (NRC) indang final draft Tentonü (Hombar) sayaogo
Assam nung alir nisung crore 3.29 nungi crore 2.90 shi India sensotem ta jangjaogo saka nisung lakh 40.07 shi NRC nung mezüluoksemi lir.
Tanü sayaba NRC ji ‘final list’ masü saka ‘final draft’ ka dang lir aser iba ajanga tenüng malirtemi NRC ketdangsertem nem kuli agütsütsü akok.
Tanü Guwahati nung NRC coordinator Sailesh-i final draft sayadang “iba ya final list masü saka draft ka dang lir. Anungji tenüng malirtemi kuli agütsütsü aser ashishiteptsü akok” ta metetdaktsü.
“Luroi (August) 30 nungi tenzüka kuli agütsüba aser ashishitepba mapa inyaktsü aser ibaji Rongjui (September) 28 tashi aotsü. Anungji chichiba India sensotemi tsübua mebilemtsüla” ta Sailesh-isa ashi.
NRC final draft sayaba sülen Assam nung Congress party tiri temulung masüba olen ka metetdaktsüogo. “Nisung lakh 40 shi mezüluokbaji aika lir aser iba atema süngmanger. Iba report nung metokmeperi aika lir. Onoki state sorkar tsüngdang aser Parliament nung ken o benoktsü. Iba mapa nung BJP indang tasa dena lir” ta Assam Congress Tir, Ripun Bora-i ashi.
Trinamool Congress (TMC)-ia NRC atema mepelaba metetdaktsü. “NRC nung Centre sorkari asaa tamangba yimsü aser oshi nung nübo agi tangar memeneper lakh 40 dak tema züngdokogo. Iba ajanga Assam den anasatepa aliba state tem nung timtem ajurutsü. PM (Narendra Modi)-i Parliament-i arur iba kuli agütsütsüla” ta TMC lennir SS Roy-i ashi.
Union home minister Rajnath Singh-ia tanü final draft nung tenüng mezülokertem dang tsübua mebilemtsü atema metetdaktsü.
“Shinga anema meinyaktsü, anungji tsübua bilemtsü nüngdak madoker. Nisung kari tensa raksatsütsü atema mapa inyaker. Iba ya impartial report ka lir aser iba dak sendakba nung osang tai mebelenshitsüla. Iba ya final list masü saka draft ka dang lir” ta Rajnath-i ashi.
Assam chief minister Sarbananda Sonowal-i Assam nunger dang NRC takok ngua adokdaktsüba atema pelaba metetdaktsü.
“Iba otsüsütsü anogo ya kodanga mamatsü. NRC draft nung madenertemi shisabulua mebilemtsüla kechiyong chichiba India sensotemi kuli agütsütsü aser ashishiteptsü atema maongka angutsü” ta Sonowal-isa metetdaktsü.