Constituency ajak nem tractor ka ka agütsü

Chiteni (July) 30, 2018 nü Agro Expo site nung tractors aser implements alemba sentong nung Chief minister Neiphiu Rio aser MLA tem agiba noksa angur.

Dimapur, Chiteni (July) 30 (TYO): Nagaland state sorkari tanü constituency 60 nem tractor aser implements/trailer 60 tashi lema agütsü.
Linük Temzüng nung Part IX & Part IX A kübok Excluded Areas nung madenba nem Grant-in-Aid (GIA)/Special Financial Assistance (SFA) kübok iba mapa inyak.
2011 indang Census data nung ajemdaker NITI Aayog-i Rongchii (April) 2017 nungi excluded areas nem senotsü lemzüktsüba indang mapa inyaktsü tenzük.
Iba scheme kübok MLA tem ajanga constituency 60 nem tractors den implements/trailer agütsü. Iba denji külemi constituency shia nem sen lakh 30 agütsü.
Dimapur nung aliba Agri Expo site nung sentong ka agidang chief minister Neiphiu Rio-i “aluyimertem mapa tayongba inyakdaktsütsü atema tractors & implements agütsür. Iba ajanga parnoki pei tsünütetba belenshiba nung teyari angutsü aser sen talila aazüktsü” ta ashi.
Tangurtemi kanga dang shisakaa aser yimtsüng nung rongsenkettsüng renloktsü atema amshitsü imlar, ta paisa ashi.
“Tanü asen loktiliba nung mapa inyakba sobaliba mali aser aayangertem dak dang imlar. Asenoki rongsenkettsüng dak sendakba maparen nung shilem agitsüla aser asenok külemi yaritepa asen rongsenkettsüng jenjang ajungkettsüla aser asenok peria alitsü asoshi inyaktsüla” ta Rio-i ayongzük.
Centre sorkari asenok peria dang yariogo aser joko asenoki sasa litettsüla, ta paisa ashi.
Niti Aayog-i Excluded areas kübok Nagaland, Meghalaya aser Mizoram, Manipur nung tenemlen aser West Bengal kübok Darjeeling hill district dendaktsüba aser special funds lemzüktsüba atema kanga pelar, ta Chief Minister Rio-isa metetdaktsü.
India sorkari 14th FC nung medemsemba tesemtem renlokdaktsütsü atema sen lemzüktsütsü lemtetogo. Iba dang ‘Excluded Areas’ ta ajar aser financial year 2017-18 nungi senotsü lemzüktsütsü atema telatetbatem agütsüogo.
GIA/SFA indang alizüngji basic civic services (water supply, sanitation including septic management, sewage & solid waste management, storm water drainage, maintenance of community assets, maintenance of roads, footpaths, street-lighting, burial aser cremation) dak sendakba maparen nung yariteptsü atema lir.
Tanü Agri Expo nung agiba sentong nung Rural Development Advisor, Dr. Neikiesalie Kire-i tesentepertem pela agizük aser Rural Development Director, Imlimeren Jamir-i anküp tepela o jembi.