Tripura nung lisopur jangjashitsü takhangba kecha mali:Deb

Nagpur, Chiteni/July 31 (Agencies): Tripura Chief Minister Biplab Kumar Deb-i tanü ashiba agi, Assam nung National Register of Citizens (NRC) ama lisopur jangjashitsü asoshi par state nung takhangba kecha mali.
Deb, shibai tanü Rashtriya Swayamsevak Sangh (RSS) tekolakba Mohan Bhagwat den ajuruteptsü asoshi Nagpur semdanga liasü, pai ashiba agi Tripura nung NRC atema takhangba kecha mali.
“Tripura nung ajak shidak dang lir aser nisung ajak ket nung kuli kaket tejangja lir. Anungji onokbo kecha tebilemtsü mali,” ta BJP lenir-i ashi.
“Assam nunga iba ken o ya kangabo sensitive masü ta nibo bilemer aser parnok Chief Minister-i tensa azüoktettsü,” ta paisa tasüngdangba langzüba mapang ashi.
Politics nung densema aliba nisung kari tensa mejungi kümdaktsütsü meranger, ta Dep-i ashi.
NRC nung ya India nunger lispurtem tenüng züngoka lir.
Congress party-i yashi NRC nung nisung lakh 40 dak tema mezüngoksemba ashishia liasü aser parnoki ashiba agi iba inyakyim ya BJP-i ajungmesoa inyaker, shirnoki nüburtem lemdangtsütsü asoshi politics asayar.
Maneni West Bengal Chief Minister Mamata Banerjee-ia NRC nung nisung lakh 40 mezüngoksemba tebilemtsü kaa ashiba agi, India nunger lisopurtem pei lima nung refugee kümogo.
Kasa mapang nung Deb aser Bhagwat na RSS headquarters nung ghonda ka shi sensaksemogo. RSS headquarters semdangba indang asüngdang dang pai ashiba agi, “Swayamsevak ajaki Nagpur sapur aser ni Sarsanghchalak nungi temoatsü meshi aru.”
Tanep Deb-i, RSS ngutetsang K B Hedgewar indang memorial semdanga tetushi agütsüogo.